Jensen Huang, drejtori ekzekutiv i Nvidia-s i larguar nga detyra, ka pasur një marrëdhënie intime me një punonjëse të dytë të kompanisë, sipas dy personave të njohur me çështjen, mëson Reuters.
Ky zbulim vjen pas dy lidhjeve të tjera jashtëmartesore që çuan në dorëheqjen e tij të enjten. Bëhet fjalë për Alice Huang, për të cilën shërbimet amerikane të inteligjencës dyshojnë se është spiune kineze, dhe Kimberly Powell, zëvendëspresidente e Nvidia-s për sektorin e kujdesit shëndetësor.
Reuters nuk po e bën publik emrin e punonjëses së dytë. Përpjekjet për ta kontaktuar atë nuk patën sukses.
Nvidia nuk pranoi të komentonte. Powell, Jensen Huang dhe një përfaqësues i bordit drejtues të Nvidia-s nuk iu përgjigjën kërkesave për koment. Alice Huang nuk u arrit të kontaktohej për të dhënë një koment.
Jensen Huang pranoi se kishte pasur një lidhje jashtëmartesore në një deklaratë të publikuar më 8 nëntor, pas raportimeve për marrëdhënien e tij me Alice Huang, pa e përmendur atë me emër.
Vendimi i ish-drejtorit ekzekutiv të Nvidia-s për t’u larguar nga kompania mund të shkaktojë tronditje në industrinë e inteligjencës artificiale, të cilën ai ndihmoi ta formësonte. Nvidia ka shfrytëzuar fuqinë e saj financiare për të ndërtuar një industri rreth inteligjencës artificiale, përmes marrëveshjeve komplekse financiare që lehtësojnë blerjen e çipave të kompanisë. Për këtë qëllim, ajo ka mbështetur kompani të shërbimeve kompjuterike në cloud dhe laboratorë të inteligjencës artificiale.
Presioni ndaj Jensen Huang, 63 vjeç, i martuar, për t’u larguar nga detyra u shtua pas raportimeve për lidhjen e tij me Alice Huang.
Bordi drejtues i Nvidia-s emëroi drejtuesen e financave, Colette Kress, si drejtoreshë ekzekutive të përkohshme, ndërsa zhvillon procesin për gjetjen e zëvendësuesit të Jensen Huang. Bordi po shqyrton kandidatë si nga brenda, ashtu edhe nga jashtë kompanisë.
Në fillim të këtij muaji, bordi i Nvidia-s nisi një hetim, të drejtuar nga anëtarë të pavarur të tij me ndihmën e këshilltarëve ligjorë të jashtëm, për të përcaktuar nëse Jensen Huang ishte bërë objektiv i një operacioni të shërbimeve të huaja të inteligjencës. Në atë kohë, bordi shprehu gjithashtu besimin tek ai.
Të enjten, aksionet e kompanisë ranë me 5,5% në një seancë me aktivitet të lartë tregtimi. Që nga kulmi i arritur në fillim të tetorit, aksionet kanë humbur më shumë se 30% të vlerës së tyre.
