Me fitoren 2 – 0 kundër Finlandës në stadiumin “Air Albania” të Tiranës, Shqipëria siguroi tri pikë me rëndësi në Ligën e Kombeve, Liga C. Pas ndeshjes, Kristjan Asllani foli për mediat.
Të lidhura
None found
“Gëzimi ynë është i madh, sidomos që morëm tri pikët para tifozëve në një stadium të mbushur plot. Nuk mund të kërkonim diçka më të bukur. Ndeshja ishte e vështirë dhe Finlanda krijoi disa raste gjatë pjesës së parë”, u shpreh ai.
Asllani tregoi se sapo kishte parë një video të golit të Muçit: “Ishte një supergol; nuk gjej fjalë! Më vjen shumë mirë për Ernestin, sepse e meriton. E di çfarë ka kaluar dhe sa i ka munguar të qenët pranë nesh. Ka shumë cilësi si lojtar dhe është një ndihmë e madhe për ne”.
Ai iu rikthye edhe ndeshjes ndaj San Marinos: “Atje bëmë shumë gabime dhe e kuptuam këtë. Sot dhamë gjithçka në fushë, me zemër e me shpirt. E mbyllëm me një fitore të bukur, ndaj jemi shumë të lumtur”.
