Gazetari Genc Burimi ka kritikuar kryeministrin Edi Rama për atë që e cilëson si standard të dyfishtë në qëndrimet ndaj ndikimit në proceset demokratike dhe zgjedhore. I ftuar në emisionin “Task Force” me Sonila Meçon në SYRI TV, Burimi vuri në dukje kontrastin mes deklaratave të kreut të qeverisë për ndikimin e rrjeteve sociale në demokracitë europiane dhe qëndrimit të tij ndaj ndikimit të krimit të organizuar dhe parave në zgjedhjet shqiptare.
Sipas gazetarit, Rama pranon se faktorë të jashtëm, përfshirë ndikimet nga Rusia, mund të ndërhyjnë në proceset zgjedhore europiane, ndërsa mohon mundësinë që bandat dhe paratë të kenë ndikuar në zgjedhjet në Shqipëri.
Burimi ngriti gjithashtu pikëpyetje mbi kohën e reagimit të SPAK-ut ndaj denoncimeve për shitblerjen e votës dhe përdorimin e burimeve shtetërore në fushatë. Në këtë kontekst, ai solli në vëmendje edhe zgjedhjet në Shkodër, duke iu referuar deklaratës së Ramës për ndërprerjen e ndihmave ndaj qytetarëve që nuk do të votonin kandidatin socialist.
Gazetari u ndal edhe te funksionimi i sistemit të drejtësisë, duke argumentuar se largimi i kryeministrit nuk do të sillte automatikisht zgjidhjen e problematikave që, sipas tij, ekzistojnë në këtë sistem. Ai vuri në diskutim edhe vështirësitë kushtetuese për ndryshimin e reformës në drejtësi, duke përmendur nevojën për një shumicë prej dy të tretash në Kuvend për ndërhyrje të caktuara.
Në fund, Burimi u shpreh kundër zhvillimit të zgjedhjeve me Edi Ramën në krye të qeverisë dhe theksoi se, sipas tij, opozita duhet të përqendrojë përpjekjet te rotacioni politik, në vend që debati të zhvendoset që tani te emrat e kandidatëve për zgjedhjet lokale.
