Kryetari i Prishtinës, Përparim Rama, ka reaguar ashpër ndaj deklaratave të ministrave Dimal Basha dhe Blerim Gashani në Kuvendin e Kosovës lidhur me organizimin e Lojërave Mesdhetare Prishtina 2030.
Përmes një postimi, Rama i ka akuzuar ata për deklarata të pavërteta dhe përpjekje për ta zhvendosur përgjegjësinë e Qeverisë te ai dhe Kryeqyteti.
Ai ka theksuar se mbështet organizimin e Lojërave Mesdhetare dhe përfshirjen e qyteteve të tjera, por kërkon që gjithçka të bëhet në përputhje me marrëveshjet e nënshkruara dhe Masterplanin e miratuar.
Rama ka rikujtuar se Prishtina dhe ai kanë vetëm tri nga 12 votat në Komitetin Organizativ, ndërsa shumicën vendimmarrëse e kanë Qeveria dhe Komiteti Olimpik i Kosovës.
Në reagimin e tij, ai ka ngritur shqetësime për mospagesën e obligimeve ndaj Komitetit Ndërkombëtar, për të cilat Qeveria ka dhënë garanci, si dhe për përpjekjet për ndryshimin e Masterplanit.
Kryetari i Prishtinës ka kritikuar edhe kryeministrin Albin Kurti, duke e akuzuar se po e përdor këtë ngjarje për agjendë populiste dhe po nxit përçarje mes qyteteve, në vend që të përmbushë obligimet institucionale.
Në fund, Rama ka paralajmëruar se vonesat dhe mosrealizimi i zotimeve mund ta rrezikojnë organizimin e Lojërave, duke kërkuar nga Qeveria që të veprojë pa humbur më shumë kohë.
Postimi pa ndërhyrje i Përparim Ramës
BASHA E GASHANI, NDALNI GËNJESHTRAT NË KUVEND! MOS I RREZIKONI LOJËRAT MESDHETARE PËR AGJENDËN TUAJ POPULLISTE!
Lojërat Mesdhetare Prishtina 2030 janë një mundësi historike për Kosovën. Kemi përgjegjësi me e jetësu këtë mundësi dhe me ua lënë brezave një trashëgimi që na bën krenarë.
Deputeti Basha dhe ministri Gashani po e përdorin foltoren e Kuvendit për me mashtru qytetarët dhe me e fsheh përgjegjësinë e Qeverisë përmes akuzave ndaj meje dhe Kryeqytetit. Letrat me vërejtje nga Komiteti Ndërkombëtar i Lojërave Mesdhetare, drejtuar Qeverisë së Kosovës, dëshmojnë qartë se ku janë problemet dhe kush duhet t’i përmbushë obligimet.
Qëndrimi im ka qenë dhe mbetet i qartë: i mbështes Lojërat dhe përfshirjen e qyteteve të tjera, në përputhje me marrëveshjet dhe Masterplanin e miratuar.
Unë dhe Kryeqyteti kemi vetëm 3 nga 12 vota në Komitetin Organizativ. Qeveria dhe Komiteti Olimpik i Kosovës e kanë shumicën vendimmarrëse. Përgjegjësinë për vendimet e tyre duhet ta marrin para qytetarëve.
Po kërkojmë zbatimin e marrëveshjeve të nënshkruara dhe të Masterplanit të hartuar nga profesionistët e të miratuar nga institucionet e Kosovës dhe Komiteti Ndërkombëtar. Çdo zotim i marrë në emër të Kosovës duhet të përmbushet.
Kryeministri Kurti po e përdor këtë ngjarje historike për agjendën e tij populiste, duke nxitur përçarje mes qyteteve dhe duke hedhur akuza për t’iu shmangur përgjegjësisë. Ndërkohë, koha për pagesat, infrastrukturën dhe përmbushjen e obligimeve po kalon.
Rreziku për këtë organizim po vjen nga veprimet dhe mosveprimet e Qeverisë:
• Mospagesa e obligimeve ndaj Komitetit Ndërkombëtar, për të cilat vetë Qeveria ka dhënë garanci.
• Përpjekjet për ndryshimin e Masterplanit të miratuar.
Afatet po mbarojnë. Çdo ditë e humbur e rëndon përgjegjësinë dhe e rrezikon këtë mundësi historike.
QEVERIA DUHET T’I PËRMBUSHË OBLIGIMET E VETA, TANI!
Ne do të vazhdojmë me punu për Prishtinën dhe për Kosovën, me përkushtimin që e kemi pasur që nga dita e parë. Qytetarët meritojnë t’i shohin Lojërat të realizohen me sukses dhe Kosovën të dalë faqebardhë para botës.
Kuvendi meriton dinjitet. Qytetarët meritojnë të vërtetën. Kosova meriton që fjala e dhënë në emër të saj të mbahet!
/Telegrafi/
