Mesfushori i Manchester City, Phil Foden, po shijon rilindjen e tij. Me ardhjen e trajnerit Enzo Maresca, ai ka rigjetur formën e dikurshme, me 4 gola deri më tani në 9 ndeshje në total me “qytetarët”.

“Personalisht, mendoj se gjërat kanë shkuar mirë. Kartoni i kuq kundër United ishte një fatkeqësi. Besoj se pushimi më bëri mirë, u ktheva me mendje të freskët dhe i mprehtë. Së fundmi kam qenë i përfshirë në shumë gola, ndaj jam vërtet i kënaqur me paraqitjet e mia“, tha Foden.

“Qëndrueshmëria është sekreti. Dua të vazhdoj të luaj rregullisht, të jem i lumtur, pozitiv dhe të pozicionohem saktë për të shënuar. Shpresoj të rikthehem në atë nivel. Mendoj se, duke parë paraqitjet e fundit, po filloj të afrohem sërish aty. Shpresoj të vazhdoj të rritem dhe të përmirësohem edhe më shumë“, shtoi mesfushori.

Më tej, ai tha: “Besoj se golat dhe përfshirja në aksione që çojnë te goli të japin shumë vetëbesim. Kur luan rregullisht, hyn në një ritëm të caktuar. Gjithashtu, ndihmon shumë fakti që luan me lojtarë të ngjashëm”.

“Kam përshtypjen se e kupton çfarë do të bëjnë shokët e skuadrës, madje pa pasur nevojë as ta mendosh. Të gjitha këto elemente ndihmojnë padyshim, por do të shohim se çfarë do të ndodhë në të ardhmen”, shtoi Foden.

Ai flet edhe për Enzo Maresca: “Sinqerisht, situata është e ngjashme, si për Enzo, ashtu edhe për mua personalisht. Unë vazhdoj të luaj në pozicione të ndryshme nën drejtimin e tij dhe secili pozicion kërkon gjëra të ndryshme nga unë.”

“E kuptoj atë ndoshta më mirë se lojtarët e tjerë, sepse kam punuar me të edhe në të kaluarën. Kjo më ndihmon të kontribuoj për ekipin dhe për shokët e skuadrës që kanë nevojë për ndihmë, ndoshta duke u pozicionuar në vendin e duhur“, tha Foden.