Tensione dhe përplasje janë regjistruar gjatë natës në rrugët e Barcelonës, në Spanjë, pas një greve të përgjithshme që u shoqërua me protesta dhe grumbullime qytetarësh.
Pamjet e publikuara tregojnë grupe të rinjsh me kapuçë, disa prej tyre me fytyra të mbuluara, që përballen me forcat e policisë katalanase, Mossos d'Esquadra. Situata është përshkallëzuar në rrugë, ku dëgjohen thirrje dhe shihen përplasje, ndërsa hidhen objekte në drejtim të zonës ku ndodhen efektivët.
Policia është shfaqur me furgonë dhe pajisje kundër trazirave, duke lëvizur nëpër rrugë dhe duke u përpjekur të kontrollojë situatën. Në asfalt dallohen mbeturina dhe sende të shpërndara, ndërsa dritat blu të automjeteve të policisë ndriçojnë zonën.
Pamjet tregojnë një situatë të tensionuar në qytet, ku protesta duket se ka kaluar përtej tubimit në rrugë dhe është shoqëruar me konfrontime me uniformat blu. Nuk ka të dhëna të konfirmuara në materialin e publikuar për numrin e të plagosurve apo personave të arrestuar.
