Kuvendi i Kosovës do të zhvillojë nesër, më 12 nëntor, një seancë plenare që nis në orën 10:00. Mes çështjeve të parashikuara për shqyrtim janë marrëveshjet ndërkombëtare, interpelanca me ministrin e Shëndetësisë, Arben Vitia, si dhe mocioni për situatën në sektorin e energjisë elektrike.
Në bazë të njoftimit të Kuvendit, deputetët do të trajtojnë tri projektligje që synojnë ratifikimin e marrëveshjeve Kosovë-Suedi për ekstradimin, transferimin e personave të dënuar dhe ndihmën e ndërsjellë juridike në çështjet penale.
Të lidhura
None found
Gjithashtu, në rendin e ditës është përfshirë edhe Projektligji për Ratifikimin e Traktatit për Ndihmë të Ndërsjellë Juridike në Çështjet Penale ndërmjet Kosovës dhe Belgjikës.
Deputetët pritet të shqyrtojnë edhe Propozim-Programin e Punës së Kuvendit për Sesionin Vjeshtor 2026.
Interpelanca me ministrin e Shëndetësisë, Arben Vitia, lidhet me rastin e pacientes me kancer të gjirit, e cila qëndroi katër muaj pa marrë terapi, si dhe me mungesën e barnave onkologjike.
Një tjetër pikë e parashikuar është mocioni përmbajtjesor lidhur me planifikimin, çmimin dhe furnizimin me energji elektrike në Kosovë.
Para trajtimit të pikave të rendit të ditës, seanca do të nisë me miratimin e procesverbalit të mbledhjes së kaluar, deklarimet jashtë rendit të ditës dhe parashtrimin e pyetjeve parlamentare.
