Myslym Murrizi, anëtar i Këshillit Kombëtar të Partisë Demokratike, kritikoi mënyrën si, sipas tij, kryeministri Edi Rama drejton qeverinë dhe ushtron kontroll mbi administratën publike.
Gjatë një interviste në emisionin “Prime News24” në News24, Murrizi pretendoi se Rama anashkalon ministrat dhe u jep udhëzime drejtpërdrejt drejtorëve të përgjithshëm. Ai tha se kryeministri telefonon vetë 30 drejtorë të përgjithshëm.
Të lidhura
None found
Sipas Murrizit, ministrat druhen të marrin përgjegjësi dhe, sapo mbërrijnë në zyrë, ua lënë firmosjen zëvendësve. Vendimet kryesore, pretendoi ai, merren nga Rama, i cili, sipas tij, ngre në piedestal pjesën më të pistë.
Murrizi foli edhe për kryebashkiakun e Tiranës, Erion Veliaj, duke ngritur pikëpyetje lidhur me punësimet në administratën bashkiake dhe ndikimin që ato mund të kenë në zgjedhje. Ai deklaroi se në strukturat e lidhura me Bashkinë e Tiranës janë punësuar 12 mijë persona dhe pretendoi se nuk ka shtëpi pa dy të punësuar.
Ai shtoi se mbetet për t’u parë nëse këta të punësuar do të qëndrojnë besnikë në zgjedhjet e 9 majit, duke i cilësuar punësimet si elektorale.
Për raportin mes Ramës dhe Veliajt, demokrati hodhi dyshime se përplasja mund të jetë pjesë e një strategjie politike. Sipas tij, një mundësi tjetër është që konflikti të shërbejë si presion për të rritur pazarin në negociata. Murrizi tha se në zgjedhje mund të nxirret një kandidat për ta çuar luftën deri në fund, por shtoi se kjo mund të jetë edhe presion i rremë dhe sinjali i parë.
Ai e përshkroi marrëdhënien mes tyre si bashkëpunim mes palësh që kanë “ngrënë gjellë të prishur në të njëjtin tas të qelbur” dhe tha se mund të ndodhin shumë gjëra. Murrizi përmendi gjithashtu marrëveshje paraprake për gjobat që, sipas tij, Rama u vendos të tjerëve, si dhe pretendimin se dikujt mund t’i thuhet të shkojë në Strasburg për të marrë 500 mln euro. Nëse shuma ndahet mes palëve apo jo, shtoi ai, është çështje tjetër.
