Demokratët në Senatin amerikan kanë nisur një hetim të ri ndaj sekretarit të Shëndetësisë dhe Shërbimeve Njerëzore, Robert F. Kennedy Jr., lidhur me dhuratat luksoze që ai ka marrë nga një donator, raportoi The Wall Street Journal.
Sipas personave të njohur me çështjen, gjatë vitit 2025 Kennedy ka marrë një sërë dhuratash nga donatori Gavin de Becker, përfshirë përdorimin e jahtit të tij gjatë një vere të financuar prej këtij të fundit, shkruan Mediaite.
Lundrimi nëpër Greqi me jahtin e një donatori ishte një dhuratë që nuk ishte raportuar më parë. Demokratët po hetojnë aktualisht dhurata me vlerë 250 mijë dollarë që Kennedy dyshohet se ka marrë, të cilat përfshijnë rreth 45 mijë dollarë shpenzime udhëtimi me avion dhe përdorimin e një banese në Uashington, D.C.
Udhëtimi me jaht në Greqi nuk ishte përfshirë në deklarimet e mëparshme financiare.
“Duket më se e qartë se zoti de Becker është një burim i ndaluar dhe se ju nuk lejohet të pranoni dhurata prej tij gjatë kohës që shërbeni si sekretar”, shkruan senatorët Ron Wyden (demokrat nga Oregon) dhe Angela Alsobrooks (demokrate nga Maryland) në një letër drejtuar Kennedy-t. “Edhe nëse ju e konsideroni atë mik, marrëdhënia juaj nuk është thjesht personale.”
Të dy ligjvënësit janë kritikë të zëshëm të Kennedy-t. Wyden pritet të marrë drejtimin e Komitetit të Financave të Senatit në fillim të vitit të ardhshëm, pasi demokratët fituan shumicën në Kongres në zgjedhjet afatmesme.
Rregullat federale të etikës lejojnë pranimin e dhuratave nga miqtë personalë, por këto dhurata bëhen të paligjshme nëse dhuruesi ka interesa në vendimmarrjet e zyrtarit ose nëse ato janë pjesë e një shkëmbimi me përfitime reciproke (quid pro quo). De Becker e ka përshkruar marrëdhënien e tij me Kennedy-n si thjesht personale.
“Si prind dhe kriminolog, librat e mi mbi abuzimet e industrisë së madhe farmaceutike datojnë shumë kohë përpara se Bobby Kennedy Jr. të fillonte punën në qeverinë federale”, i tha ai The Wall Street Journal. “Unë kam interes për lirinë mjekësore dhe shëndetin, por nuk kam asnjë interes në Departamentin e Shëndetësisë dhe Shërbimeve Njerëzore.”
Një zëdhënës i departamentit të Kennedy-t mohoi çdo shkelje dhe deklaroi se zyrtari i lartë i shëndetësisë kishte paraqitur një deklarim financiar, i cili ishte “shqyrtuar dhe certifikuar nga zyrtarët e etikës së agjencisë”.
