Qindra shkolla në Mbretërinë e Bashkuar dhe Irlandë janë vënë në alarm pasi kanë marrë mesazhe kërcënuese përmes postës elektronike. Policia ka nisur hetimet, por deri më tani i ka cilësuar këto kërcënime si të pabesueshme dhe pa rrezik konkret.

Policia e Irlandës së Veriut bëri të ditur se po heton emaile kërcënuese të dërguara në më shumë se 300 shkolla. Sipas autoriteteve, mesazhet dyshohet se kanë origjinën jashtë Mbretërisë së Bashkuar.

Incidente të ngjashme janë raportuar edhe në shkolla të ndryshme në Skoci, ndërsa në Irlandë mesazhe të tilla kanë mbërritur në një numër institucionesh arsimore.

Pavarësisht shqetësimit të krijuar, autoritetet policore kanë theksuar se kërcënimet nuk konsiderohen të besueshme. Për këtë arsye, nuk është dhënë rekomandim për evakuimin e shkollave.

Hetimet vijojnë për të identifikuar burimin e mesazheve dhe personat përgjegjës për dërgimin e tyre.