Republikanët në Dhomën e Përfaqësuesve në SHBA kanë bllokuar përpjekjen për shkarkimin e sekretarit të Mbrojtjes, Pete Hegseth, ndaj të cilit ishin ngritur akuza për shkelje të Kushtetutës amerikane. Në qendër të kritikave ishte vendimi për nisjen e operacioneve ushtarake kundër Iranit pa marrë më parë autorizimin e Kongresit.
Përveç ndërhyrjes ushtarake në Iran, Hegseth akuzohej edhe për sulmet ndaj anijeve të dyshuara për trafik droge në Karaibe, operacionet në Jemen, kapjen e presidentit venezuelian Nicolás Maduro dhe presionet e pretenduara ndaj senatorit demokrat Mark Kelly.
Me 211 vota pro dhe 204 kundër, Dhoma e Përfaqësuesve miratoi kalimin e tetë akuzave në Komisionin e Drejtësisë, duke ndalur për momentin procedurën e shkarkimit. I vetmi republikan që votoi në mbështetje të nismës së demokratëve ishte Thomas Massie, i cili ishte edhe iniciatori i rezolutës.
Presidenti Donald Trump reagoi menjëherë pas votimit, duke e cilësuar rezultatin si një fitore për administratën e tij. Në një postim në platformën Truth Social, ai shkroi se përpjekja e demokratëve për të shkarkuar Hegseth kishte dështuar në mënyrë të turpshme.
“Një patriot i madh amerikan u shpall i pafajshëm”, deklaroi Trump, duke mbrojtur njëkohësisht operacionet ushtarake amerikane në Iran dhe Venezuelë.
Nga ana tjetër, sekretari i Mbrojtjes i hodhi poshtë të gjitha akuzat, duke i cilësuar ato si një farsë politike. Hegseth mbrojti ligjshmërinë e operacioneve ushtarake, ndërsa theksoi se presidenti Trump kishte vepruar në interes të sigurisë kombëtare amerikane.
Megjithatë, çështja politike mund të rikthehet në vëmendje në janar, kur demokratët pritet të marrin kontrollin e Dhomës së Përfaqësuesve pas rezultateve të zgjedhjeve të mesmandatit.
Ndërkohë, zhvillimet politike kanë sjellë edhe ndryshime në drejtimin e republikanëve në Kongres. Jim Jordan është zgjedhur për të udhëhequr republikanët në Dhomën e Përfaqësuesve si forcë e pakicës, duke zëvendësuar Mike Johnson, ndërsa John Thune është rizgjedhur në krye të republikanëve në Senat.