Pamje të frikshme janë regjistruar në plazhin e famshëm Cannon Beach, në Oregon të SHBA-së, ku një valë e papritur përfshiu një vajzë të vogël dhe nisi ta tërhiqte drejt detit, duke shkaktuar panik te prindërit e saj. Ngjarja u filmua nga Karin Kelsey Madsen, e cila ndodhej në plazh me bashkëshortin e saj gjatë fundjavës së kaluar.

Në pamje shihet momenti kur një valë e fuqishme mbërrin papritur në breg, rrëzon fëmijën dhe e tërheq larg prindërve. Babai vrapon menjëherë drejt vajzës për ta nxjerrë nga uji, ndërsa edhe nëna përfshihet nga dallga dhe rrëzohet. Sapo arrin të ngrihet, ajo niset me vrap drejt fëmijës, ndërsa babai tashmë e ka marrë vajzën në krahë. “Po, kjo është arsyeja pse nuk duhet ta kthesh shpinën”, dëgjohet të thotë Madsen, e cila po filmonte skenën.

Edhe bashkëshorti i saj vrapoi drejt familjes për t’u siguruar që të gjithë ishin mirë. Nëna e qetësoi duke i thënë se vajza ishte mirë. Megjithatë, Madsen tregoi se në momentin kur fëmija u nxor nga uji, ajo dukej “si një kukull lecke”. Nuk ka informacion të konfirmuar nëse vajza pësoi lëndime. Fenomeni njihet si “sneaker wave”, ose valë e papritur bregdetare. Bëhet fjalë për dallgë që mund të mbërrijnë papritur dhe të depërtojnë shumë më lart në plazh se valët e zakonshme, duke kapur në befasi personat që ndodhen pranë ujit.

Cannon Beach është një nga plazhet më të njohura në Oregon, i famshëm për peizazhet piktoreske dhe shkëmbin e madh detar Haystack, i cili ngrihet më shumë se 70 metra mbi nivelin e detit. Në këtë zonë janë xhiruar edhe skena të filmit të njohur “The Goonies”, në vitin 1984. Valët e papritura janë një rrezik i njohur në këtë plazh, veçanërisht gjatë muajve të vjeshtës dhe dimrit. Autoritetet këshillojnë vizitorët të mos u kthejnë shpinën dallgëve dhe të qëndrojnë larg vijës së ujit. Në rast se dikush përfshihet nga një valë e tillë, duhet të ruajë qetësinë dhe të shmangë përplasjen me mbeturinat që mund të transportohen nga uji. Ndërsa, nëse një person tjetër rrëmbehet nga dallga, këshillohet të mos hidheni menjëherë në det për ta shpëtuar, por të kërkoni ndihmë dhe ta mbani nën vëzhgim nga një pozicion i sigurt në breg.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: