Nënkryetari i Grupit Parlamentar të Partisë Demokratike, Belind Këlliçi, ka kërkuar në mbledhjen e Konferencës së Kryetarëve caktimin e një date për shqyrtimin në Kuvend të katër nismave ligjore të depozituara nga opozita.

Nismat e PD-së parashikojnë shfuqizimin e ligjit për Investimet Strategjike, të ndryshimeve në ligjin për Zonat e Mbrojtura, të ligjit për Paketën e Maleve dhe të disa dispozitave të ligjit për Trashëgiminë Kulturore.

Këlliçi akuzoi mazhorancën se po i mban këto propozime pa një datë shqyrtimi dhe kërkoi që ato të përfshihen në rendin e ditës të seancës së ardhshme parlamentare.

Duke u ndalur te ligji për Investimet Strategjike, deputeti demokrat pretendoi se gjatë 11 viteve të zbatimit të tij, 98% e kontratave u janë dhënë pesë oligarkëve dhe përfaqësuesve të krimit të organizuar, ndërsa vetëm 2% lidhen me investitorë të huaj. Ai pretendoi gjithashtu se edhe këta investitorë kanë lidhje të afërta me kryeministrin Edi Rama.

Sipas Këlliçit, ligji është përdorur edhe për pastrimin e parave, veçanërisht në sektorin e ndërtimit në bregdet.

Gjatë fjalës së tij, ai iu referua edhe raportit të fundit të Komisionit Evropian për Shqipërinë, duke përmendur si problematika dobësimin e kontrollit parlamentar, cenimin e të drejtave të opozitës dhe moszbatimin e disa vendimeve të Gjykatës Kushtetuese.

Këlliçi ngriti gjithashtu çështjen e imunitetit të Belinda Ballukut, duke pretenduar se në këtë rast është cenuar parimi i barazisë përpara ligjit.

Në përfundim, ai i kërkoi drejtuesve të Kuvendit të garantojnë shqyrtimin e nismave të opozitës dhe respektimin e rregullave parlamentare.

“Mos e përdorni Kuvendin si paradhomë të Partisë Socialiste. Ju nuk mund t’i trajtoni institucionet e këtij vendi si pronë private”, deklaroi Këlliçi.