Përkeqësohet ndjeshëm gjendja shëndetësore e aktorit Bruce Willis, bashkëshortja e tij: Jemi në gjendje zie

Bruce Willis ka shfaqur “një përkeqësim të ndjeshëm të gjendjes së tij shëndetësore” dhe “jeton në botën e tij”, tre vjet pas diagnostikimit me demencë frontotemporale (FTD), sipas një artikulli të ri të publikuar në media.

“Disa herë duket si një foshnjë që vështron me kureshtje një objekt, duke u përpjekur thjesht ta vëzhgojë dhe ta kuptojë”, tha një burim për gazetën Daily Mail.

“Megjithatë, nëse e sheh, nga jashtë duket si një burrë i shëndetshëm në moshë të mesme”, shtoi ai.

I njëjti burim bëri të ditur se aktori 71-vjeçar nuk është i vetëdijshëm për përkeqësimin e gjendjes së tij mendore.

“Ai e di se jeta e tij ka ndryshuar, por nuk mendon se është kaq ndryshe”, pretendoi burimi.

“Nuk flet për këtë dhe as nuk ankohet shumë. E ndien se diçka nuk shkon, por nuk është në gjendje ta kuptojë plotësisht se çfarë po ndodh”, vijoi më tej ai.

Megjithëse personaliteti i Willis ka ndryshuar ndjeshëm krahasuar me vitet e mëparshme, kur “kishte shumë energji dhe fliste pa ndërprerje”, sipas burimit, aktori duket se tashmë është më “i qetë dhe më i paqtë”.

Bashkëshortja e tij, Emma Heming Willis, e cila tashmë është edhe aktiviste, dha një intervistë për revistën HELLO!, ku përshkroi peshën emocionale të të parit të bashkëshortit duke humbur gradualisht pjesë të vetvetes për shkak të kësaj sëmundjeje progresive.

“Është jashtëzakonisht e vështirë dhe e dhimbshme. Është e natyrshme. Të gjithë duam që njerëzit që duam të jenë të shëndetshëm, plot jetë dhe të mbeten ashtu siç kanë qenë gjithmonë. Por FTD-ja është një sëmundje shkatërruese, që të merr gjëra shumë ngadalë, njëra pas tjetrës. Kështu, realiteti është se gjendesh vazhdimisht në një gjendje zie”, u shpreh ajo.

Willis u diagnostikua me këtë sëmundje progresive në shkurt të vitit 2023, rreth një vit pasi familja e tij kishte njoftuar tërheqjen e tij nga aktrimi, pas diagnostikimit me afazi.