Gazetarja e kronikës, Klodiana Lala, ka dhënë detaje mbi organizimin dhe aktivitetin e një grupi kriminal, duke u ndalur te roli i Franc Çopjas dhe dhe Ervis Çela, që SPAK i akuzon si si drejtues të organizatës që trafikonte kokainë nga Amerika e Jugut drejt Europës, ndërsa pasuritë e sekuestruara kapin vlerën e mbi 9 milionë eurove.
E ftuar në emisionin “Opinion”, në TV Klan, Lala thotë se në organizatën e përmendur, një prej personave kryesorë është Ervis Çela, i cili nuk ishte bërë i njohur për autoritetet deri në momentin e arrestimit në Qeparo.
Gazetarja u ndal edhe te përplasjet e përgjakshme mes Franc Çopjas dhe Erion Alibejt, duke shpjeguar se konflikti mes tyre nisi për çështje të trafikut të drogës në Britaninë e Madhe. Përplasjet kulmuan me masakrën e Bradasheshit dhe më pas vijuan me një seri vrasjesh.
Lala zbuloi gjithashtu detaje nga mënyra se si grupi menaxhonte paratë e përfituara nga aktiviteti kriminal.
Ajo tregoi se në një moment, grupit i ishte prishur makina e numërimit të parave dhe anëtarët kishin kërkuar një tjetër pajisje për t’i numëruar ato, detaj që, sipas saj, ndodhet edhe në dosjen hetimore.
Një tjetër element i veçantë që përmendi gazetarja ishte përdorimi i kriptomonedhave dhe lingotave të arit. Sipas saj, Franc Çopja ishte i pari që futi këto forma të ruajtjes së pasurisë në aktivitetin e grupit kriminal. Ajo theksoi se për herë të parë, lingotat e arit ishin groposur në ullishte.
Ndërkohë, pasuria e sekuestruar në kuadër të hetimeve ndaj këtij grupi kriminal kap vlerën e 9.2 milionë eurove.
“ Në këtë organizatë që ju nxorët, kryesori është Ervis Çela. Francë Çopja ka një sërë vrasjesh në përballjen me Erjon Alibej, që është kreu i një grupimi kriminal. Konflikti nisi për çështjet e drogës në Britaninë e Madhe, ndodhi masakra e Bradasheshit dhe më pas u bë sërish seri vrasjesh. Ndërkohë, Ervis Çela nuk është njohur deri në ditën kur është arrestuar në Qeparo, sepse ai kishte jetuar 25 vjet në Paraguai.
Ore, këtu ka një problem. Atyre u prishet makina e numërimit të parave dhe kanë kërkuar një makinë për t’i numëruar. Këtë e ke në dosje. Franc Çopja është i pari që futi kriptomonedhat dhe lingotat e arit. Këta, për herë të parë, i groposën në ullinj. Pasuria e sekuestruar është 9.2 milionë euro.”, tha ajo.
