Nënkryetari i Lidhjes Demokratike të Kosovës (LDK), Lutfi Haziri, tha në emisionin “RTK Prime” se vendimet politike e kanë ndëshkuar partinë e tij dy herë në zgjedhje. Sipas tij, LDK-ja ka marrë një goditje të fortë elektorale për shkak të tyre.
Haziri u shpreh se gjatë vitit të kaluar LDK-ja humbi pragmatizmin politik që e kishte karakterizuar ndër vite. Ai tha se qytetarët ishin mësuar ta shihnin partinë si bashkëpunuese dhe si urë lidhëse mes subjekteve politike. Sipas tij, ky rol kishte qenë një mundësi e jashtëzakonshme për të vënë në praktikë pragmatizmin politik që LDK-ja ia kishte mësuar popullit.
Të lidhura
None found
Duke folur për rezultatet jo të kënaqshme zgjedhore, Haziri ngriti pyetjen nëse LDK-ja kishte treguar ndonjëherë vullnet të mjaftueshëm për të hyrë në zgjedhje. Ai theksoi se perceptimi i qytetarëve nuk përputhet domosdoshmërisht me të vërtetën, por, nëse ata besojnë se partisë i ka munguar ky vullnet, atëherë një arsye për këtë bindje ka ekzistuar. Ai pranoi se rezultatet zgjedhore të LDK-së nuk kanë qenë të mira.
Për procesin e fundit politik, Haziri tha se LDK-ja e kishte refuzuar ofertën për bashkëqeverisje. Sipas tij, partia kishte kërkuar bashkëpunim gjithëpërfshirës, duke i dhënë përparësi proceseve dhe jo ndarjes së pushtetit.
Haziri tha gjithashtu se Kosova përballet me procese dhe sfida të mëdha. Ai vlerësoi se vendit i duhen vendime të guximshme, edhe kur ato nuk gëzojnë mbështetje popullore, dhe paralajmëroi se disa prej vendimeve që e presin Kosovën mund të jenë ndër më jopopulloret. Njëkohësisht, ai vuri në dyshim gatishmërinë e kryeministrit për t’i zbatuar zotimet e tij.
