Pamjet e atentatit me armë zjarri në Orihuela Costa të Spanjës, ku u vra një 39-vjeçar shqiptar, janë bërë publike. Ngjarja ndodhi në kompleksin sportiv dhe argëtues Playa Flamenca Sport Club, në zonën e Playa Flamenca.
Sipas mediave spanjolle, shqiptari ndodhej në tarracën e një lokali kur një person iu afrua dhe hapi zjarr ndaj tij disa herë. Pas të shtënave, autori u largua me shpejtësi nga vendngjarja duke përdorur një skuter.
Në vendin e ngjarjes mbërriti ambulanca e urgjencës SAMU, por pavarësisht ndërhyrjes së ekipit mjekësor, 39-vjeçari nuk arriti të mbijetonte.
Pas krimit, zona u rrethua nga efektivët e Gardës Civile spanjolle. Në hetime u angazhuan edhe specialistë të Policisë Gjyqësore dhe Laboratorit Kriminalistik, të cilët kryen këqyrjen e vendit ku ndodhi atentati dhe mbledhjen e provave.
Autoritetet po punojnë për identifikimin dhe kapjen e autorit, ndërsa një nga elementet ku janë përqendruar hetuesit është itinerari që ai ndoqi për t’u larguar me skuter.
Për momentin, motivi i vrasjes mbetet i paqartë. Hetuesit nuk përjashtojnë mundësinë e një atentati të organizuar dhe po verifikojnë edhe pistën e konflikteve të mëparshme apo të larjes së hesapeve.
