Sekretari amerikan i Shtetit, Marco Rubio, deklaroi se presioni ekonomik dhe bllokada detare ndaj Iranit po japin rezultate, duke theksuar se presidenti Donald Trump nuk ka nevojë të ndërmarrë operacione të mëdha ushtarake për të arritur objektivat e SHBA-së.

Duke folur për gazetarët në Paris, pas dy ditësh takimesh me aleatët e G7-ës, Rubio hodhi poshtë pretendimet se pezullimi i sulmeve ushtarake do të përbënte një ngërç apo ruajtje të status quo-së.

“Presioni ekonomik që po ushtrohet aktualisht ndaj Iranit është i jashtëzakonshëm dhe po shtohet vazhdimisht. Ai po rritet çdo ditë”, u shpreh Rubio.

Ai theksoi se edhe aleatët e SHBA-së në Lindjen e Mesme kanë ndarë të njëjtin vlerësim me Trumpin, duke shtuar se Uashingtoni mund të arrijë objektivat e tij përmes presionit ekonomik, pa pasur nevojë për sulme të reja.

“Nuk kemi nevojë të kryejmë sulme ushtarake nëse arrijmë të njëjtin objektiv përmes mjeteve ekonomike dhe presionit ekonomik. Kjo nuk është ngërç”, deklaroi kreu i diplomacisë amerikane.

Rubio pretendoi gjithashtu se Irani nuk është përballur më parë me kufizime të tilla në shitjen e energjisë në tregjet ndërkombëtare.

Ndërkohë, presidenti Trump kishte deklaruar një ditë më parë se do të pezullonte përkohësisht sulmet e reja ndaj Iranit, pas kërkesave të disa vendeve të rajonit, përfshirë Katarin.

Çështja e luftës me Iranin ka shkaktuar gjithashtu debate në politikën e brendshme amerikane.

Trump ka pranuar se konflikti ishte një nga faktorët që ndikuan në humbjen e republikanëve në zgjedhjet e ndërmjetme për Kongresin. Më i drejtpërdrejtë ishte zëvendëspresidenti JD Vance, i cili deklaroi: “Arsyeja pse humbëm është lufta”.