Top Channel siguroi katër fletëanaliza të datave 27–29 tetor që tregojnë nivele të larta të aflatoksinës M1. Në emisionin “Ftesë në 5” me Bieta Sulon, ishte i ftuar Kryeinspektori i Përgjithshëm, Dashnor Sula, i cili foli për kontrollet e ushqimeve në pikat doganore, problematikat me importin e misrit dhe masat për sigurinë ushqimore.
Sula njoftoi bllokimin e dy subjekteve që eksportojnë misër dhe deklaroi se së shpejti inspektimet në 13 pikat doganore të Shqipërisë do të kryhen përmes një sistemi online, për të shmangur kontrollet “me blloqe në dorë” dhe mungesën e informacionit të plotë. “Së shpejti në 13 pikat doganore të Shqipërisë, nuk do të kemi më inspektim që bëhet me blloqe në dorë pa informacion, por do të jetë inspektim online nëpërmjet sistemit ku informacioni vjen online në Inspektorat edhe në AKU”, tha ai.
Kryeinspektori u ndal te problematikat me misrin e importuar nga Serbia, i përdorur për ushqimin e kafshëve dhe që rezultonte me përmbajtje aflatoksinë mbi normat e lejuara. Sula tha se, pasi u informua për situatën në pikën doganore të Hanit të Hotit, mori masa ndaj nëntë inspektorëve, të cilët u shkarkuan.
Sipas tij, gjatë vitit 2026 janë kryer 3,504 kontrolle për importet e ushqimit për kafshë dhe 54 kontrolle në terren në subjektet që importojnë dhe tregtojnë këto produkte. Nga 53 mostrat e analizuara për praninë e aflatoksinës janë konstatuar raste jo konforme me nivele mbi normat e lejuara. Si pasojë janë bllokuar 105.6 tonë misër për ushqimin e kafshëve; prej tyre 51.3 tonë janë asgjësuar, ndërsa 54.3 tonë vijojnë të jenë të bllokuara në proces asgjësimi.
Sula pranoi se nuk është arritur ende standardi europian, por tha se situata po përmirësohet gradualisht: “Nuk pretendoj se kemi bërë mrekulli, nuk pretendoj se kemi arritur standardet europiane, por rruga është një rrugë e nisur.” Ai theksoi nevojën për kontrolle të rrepta në kufi me tolerancë zero ndaj produkteve jo-standard dhe për shtim të inspektimeve të vazhdueshme nga strukturat rajonale të AKU-së në baxho dhe në subjektet e tjera që merren me prodhimin dhe tregtimin e produkteve ushqimore. “Po bëjmë të pamundurën për ta ndryshuar situatën rrënjësisht”, përfundoi Kryeinspektori.