Delegacionet e Ukrainës, Rusisë dhe Shteteve të Bashkuara të Amerikës kanë përfunduar ditën e parë të negociatave trilaterale në Abu Dabi, duke shënuar takimin e tyre të parë të këtij lloji pas më shumë se nëntë muajsh.

Ky raund bisedimesh vjen si pjesë e përpjekjeve intensive të Uashingtonit për t’i dhënë fund luftës thuajse pesëvjeçare, ndërsa Kievi përballet me presione në lidhje me lëshimet territoriale. Përfaqësuesi i Rusisë në këtë tryezë është ndihmësi presidencial Vladimir Medinsky, historiani i njohur për qëndrimet e tij ultrakonservatore, ndërsa pala ukrainase po merr pjesë me fokus të veçantë te garancitë e sigurisë dhe çështjet humanitare.

Nga samiti i G7 në Paris, Sekretari amerikan i Shtetit, Marco Rubio, i cilësoi bisedimet e ditës së parë si “shumë produktive”, ndërsa theksoi domosdoshmërinë që formati trilateral të zgjerohet duke përfshirë edhe partnerët evropianë për të garantuar një zgjidhje qëndrueshme afatgjatë.

Ndërkohë, Presidenti i Ukrainës, Volodymyr Zelensky, bëri me dije gjatë vizitës së tij në Danimarkë se diskutimet në Emiratet e Bashkuara Arabe u përqendruan kryesisht te shkëmbimi i robërve të luftës dhe kthimi i fëmijëve të deportuar.

Nga ana tjetër, kryeministrja daneze Mette Frederiksen paralajmëroi se një fitore e mundshme e Rusisë do të rrezikonte sovranitetin e vendeve të tjera evropiane, përfshirë ato të NATO-s. Negociatat në Abu Dabi pritet të rifillojnë ditën e nesërme.

/rtsh.al/