Ministri i Brendshëm, Ervin Demo, ka zhvilluar një vizitë në pallatin pesëkatësh në Elbasan, ku shpërthimi tragjik i një bombole gazi u mori jetën dy personave. Gjatë vizitës, Demo u shpreh se po shqyrtohen mundësitë për menaxhimin e situatës dhe gjetjen e një zgjidhjeje për banorët e prekur.
“Ne po shqyrtojmë, në bashkëpunim me të gjitha institucionet, hapat që duhet të ndërmarrim për zgjidhjen e këtij problemi. Fillimisht, kemi vlerësimin e Institutit të Ndërtimit, i cili ka konstatuar se pallati është i dëmtuar dhe i pabanueshëm.
Duke qenë se kemi të bëjmë me një problem strukturor, duhet të marrim një vendim për mënyrën se si do të vijojmë, duke shqyrtuar të gjitha alternativat e rindërtimit, si dhe mundësi të tjera për akomodimin e banorëve dhe familjeve që kanë pasur banesat e tyre në këtë pallat.
Sot jam këtu për të diskutuar me të gjitha institucionet lokale mbi rrugët që duhet të ndjekim për t’i dhënë një zgjidhje afatgjatë kësaj problematike, si dhe për të përcaktuar masat që duhen marrë për të përballuar periudhën tranzitore”, deklaroi Demo.