Pas përplasjes së bërë publike në rrugën Onhezmi, në lagjen nr. 1 të Sarandës, Alqi Paguni ka përcjellë në redaksinë e Publik.al dokumentacionin e marrëdhënies kontraktore dhe një kujtesë noteriale, përmes së cilave kundërshton mënyrën se si është paraqitur publikisht konflikti.
Pronari pretendon se ngjarja nuk mund të shihet vetëm përmes pamjeve filmike të përplasjes, pa marrë parasysh historikun e marrëdhënies së qirasë, detyrimet e parashikuara në kontratë dhe njoftimin zyrtar për përfundimin e saj.
Në dokumentacionin e vënë në dispozicion përmenden Natasha Rombola, e njohur si “Tasha”, dhe vajza e saj, Brunilda Brinja. Sipas sqarimit të përcjellë nga pala denoncuese, Brunilda ia ka dhënë ambientin me qira nënës së saj. Ndërkohë, kujtesa noteriale e hartuar nga pronari më 14 tetor 2026 i drejtohet drejtpërdrejt Natasha Rombolës.
Kontrata e 6 majit 2022 dhe amendimi i një muaji më pas
Sipas dokumentit noterial, Alqi Paguni është pronari i pasurisë me numër 13/82, zona kadastrale 8641, në lagjen nr. 1 të Sarandës.
Në aktin noterial referohet kontrata e qirasë nr. 428 Rep. dhe nr. 211 Kol., e datës 6 maj 2022, e hartuar përpara noterit Gentian Bineri.
Në kontratën fillestare përcaktohet një sipërfaqe prej 193.13 metrash katrorë, ndërsa afati i marrëveshjes ishte katër vjet. Qiraja mujore ishte parashikuar në vlerën 10 mijë lekë, me pagesë paraprake brenda datës 20 të çdo muaji.
Megjithatë, marrëveshja u ndryshua përmes një akti të dytë noterial. Më 13 qershor 2022 u hartua amendimi i kontratës së qirasë nr. 526 Rep. dhe nr. 264 Kol., përmes të cilit afati i saj u ndryshua nga katër në dhjetë vjet.
Vlera mujore e qirasë mbeti 10 mijë lekë, ndërsa u ruajt edhe detyrimi për pagesën e saj sipas afateve të përcaktuara në kontratë.
Pika 6.1: Kontrata zgjidhet për faj të qiramarrësit në rast mospagimi
Një nga elementet më të rëndësishme të dokumentacionit është neni 6 i amendimit të kontratës, ku përcaktohen kushtet e përfundimit të marrëdhënies së qirasë.
Në pikën 6.1 thuhet shprehimisht:
“Kontrata quhet e zgjidhur për faj të qiramarrësit, në rast se ai nuk paguan qiranë sipas afateve të përcaktuara në këtë kontratë”.
Ky përcaktim është thelbësor në pretendimet e Alqi Pagunit, i cili në kujtesën noteriale deklaron se qiraja nuk është paguar gjatë gjithë periudhës, që nga dita e nënshkrimit të kontratës deri në hartimin e aktit noterial.
Pra, pronari nuk mbështetet vetëm te kërkesa për lirimin e objektit, por edhe te një klauzolë e përfshirë në amendimin e marrëveshjes, e cila parashikon zgjidhjen e kontratës për faj të qiramarrësit në rast të mospagimit të qirasë.
Në pikën 6.2, nga ana tjetër, përcaktohet se kontrata nuk mund të zgjidhet nga asnjëra prej palëve përpara përfundimit të afatit, pa shkaqe ligjore. Kjo dispozitë lexohet së bashku me pikën 6.1, e cila parashikon shprehimisht rastin e mospagimit të qirasë.
Neni 5.6 dhe detyrimi për pagesën e ujit dhe energjisë
Një tjetër pikë e kontratës që pronari sjell në vëmendje është neni 5.6, ku përcaktohet detyrimi i qiramarrësit për të paguar energjinë elektrike dhe ujin e konsumuar gjatë periudhës së përdorimit të objektit.
Në kujtesën noteriale, Alqi Paguni pretendon se edhe këto detyrime nuk janë përmbushur.
Ai i referohet pikërisht pikës 5.6 të kontratës, e cila parashikon:
“Ai detyrohet të paguajë energjinë elektrike dhe ujin që ka harxhuar për kohën e përdorimit, sipas afatit të kontratës”.
Pronari pretendon se faturat dhe detyrimet e krijuara nga konsumi i ujit kanë mbetur të papaguara, ndërsa më herët ka ngritur pretendimin për një borxh që arrin në rreth 13 milionë lekë ndaj Ujësjellës-Kanalizimeve Sarandë. Kjo shumë mbetet pretendim i palës pronare dhe kërkon verifikim përmes faturave dhe dokumentacionit të institucionit.
Kujtesa noteriale e 14 tetorit: Kërkohet lirimi i pronës deri më 30 tetor
KLIKO KËTU PËR TË PARË KUJTESËN NOTERIALE
Më 14 tetor 2026, Alqi Paguni është paraqitur përpara noterit Gentian E. Bineri, në Gjirokastër, ku ka hartuar një kujtesë noteriale drejtuar Natasha Rombolës.
Në këtë akt, pronari rendit dy shkeljet që pretendon se janë kryer nga pala tjetër: mospagesën e qirasë gjatë gjithë periudhës së kontratës dhe mospagesën e detyrimeve për ujin e konsumuar.
Në vijim, ai njofton prishjen e njëanshme të akteve noteriale të mëparshme:
- Kontratës së qirasë nr. 428 Rep. dhe nr. 211 Kol., datë 6 maj 2022.
- Amendimit të kontratës së qirasë nr. 526 Rep. dhe nr. 264 Kol., datë 13 qershor 2022.
Përmes të njëjtit dokument, Natasha Rombolës i kërkohet që deri më 30 tetor 2026 të lirojë dhe dorëzojë pasurinë, të kryejë pagesat e qirasë nga dita e nënshkrimit të kontratës deri në hartimin e aktit, të shlyejë detyrimet e ujit sipas faturave të Ujësjellës-Kanalizimeve Sarandë dhe të paguajë çdo detyrim tjetër të prapambetur.
Në kujtesën noteriale thuhet gjithashtu se, në rast se kërkesat nuk përmbushen dhe nuk ka përgjigje nga pala tjetër, pronari do t’i drejtohet rrugës ligjore.
Një tjetër element i rëndësishëm është paralajmërimi se, nga data 30 tetor 2026 e në vijim, pronari kërkon dëmshpërblim për mbajtjen dhe shfrytëzimin e pretenduar pa të drejtë të pasurisë.
Dokumentet kundër versionit të paraqitur publikisht
Përmes këtij dokumentacioni, Alqi Paguni synon të tregojë se konflikti në rrugën Onhezmi ka një histori kontraktore që paraprin përplasjen e filmuar dhe se ai i ka kërkuar palës tjetër përmbushjen e detyrimeve dhe dorëzimin e pronës përpara se të ndiqte më tej rrugën ligjore.
Kujtesa noteriale përbën një njoftim zyrtar të pronarit, ku parashtrohen pretendimet e tij dhe kërkesat ndaj Natasha Rombolës. Ajo dokumenton gjithashtu se pronari ka njoftuar prishjen e kontratës dhe ka vendosur një afat për lirimin e objektit. Megjithatë, akti noterial nuk përbën vetvetiu një vendim gjyqësor që vërteton shkeljet e pretenduara apo zgjidh të gjitha çështjet e posedimit të pronës.
Në këtë histori mbetet për t’u dëgjuar edhe versioni i Natasha Rombolës dhe i vajzës së saj, Brunilda Brinja, për marrëdhënien e qirasë, pagesat dhe pretendimet e pronarit. Po kështu, mbetet e hapur e drejta e deputetes Ina Zhupa për të sqaruar arsyen e pranisë së saj në konflikt.
Publik.al sjell dokumentet dhe dëshminë e palës pronare për të plotësuar panoramën e një ngjarjeje që është bërë publike fillimisht përmes pamjeve të përplasjes, por që tashmë ngre edhe pikëpyetje mbi kontratën, detyrimet financiare dhe të drejtën e përdorimit të pronës./PublikMedia
