Jo çdo model krijon të njëjtin efekt në trup. Disa detaje në prerje, gjatësi dhe qepje mund ta ndryshojnë dukshëm pamjen dhe harmoninë e veshjes
Kur blejmë një xhaketë dimërore, zakonisht mendojmë për ngrohtësinë, rehatinë dhe përshtatjen me stilin tonë. Megjithatë, një rol po aq të rëndësishëm luan edhe prerja, sepse modelet e ndryshme mund ta ndryshojnë dukshëm pamjen e siluetës.
Ndryshe nga palltot klasike, xhaketat dimërore shpesh kanë më shumë vëllim për shkak të mbushjes, qepjeve dhe materialeve të trasha. Prandaj, zgjedhja e modelit të duhur mund të krijojë një pamje më harmonike dhe t'i nxjerrë në pah tiparet që dëshironi të theksoni.
Cilat xhaketa u përshtaten vajzave me trup të hollë?
Vajzave me trup të hollë mund t'u përshtaten veçanërisht xhaketat e gjera, të njohura si modele oversized, si dhe xhaketat e fryra (puffer), të cilat i japin më shumë vëllim pjesës së sipërme të trupit.
Modelet e shkurtra, me mbushje më të theksuar, krijojnë kontrast interesant kur kombinohen me pantallona të ngushta, xhinse ose streçe. Ndërkohë, xhaketat me supe të theksuara dhe kapuçë të mëdhenj mund ta bëjnë siluetën të duket më e strukturuar.
Një zgjedhje tjetër janë xhaketat me qepje horizontale, të cilat krijojnë përshtypjen e një vëllimi më të madh.
Edhe modelet me jakë të lartë janë të përshtatshme për një pamje sportive dhe bashkëkohore.
Për vajzat që dëshirojnë ta theksojnë belin, xhaketat me rrip mund të krijojnë një raport më të dukshëm ndërmjet pjesës së sipërme dhe të poshtme të trupit.
foto: jorgeliz
Modelet që u shkojnë vajzave me forma më të plota
Për vajzat me forma më të plota, xhaketat me linja të pastra dhe prerje të strukturuar mund të krijojnë një pamje elegante, pa shtuar shumë vëllim vizual.
Kjo nuk do të thotë se duhet të shmangen xhaketat e fryra. Përkundrazi, modelet me mbushje të shpërndarë në mënyrë të njëtrajtshme dhe qepje më diskrete mund të jenë zgjedhje shumë të mira.
Veçanërisht të përshtatshme janë xhaketat paksa të ngushtuara në bel, modelet me rrip dhe ato që ndjekin natyrshëm linjën e trupit.
Qepjet vertikale mund të krijojnë përshtypjen e një siluete më të zgjatur, ndërsa pjesa e përparme pa shumë xhepa të mëdhenj apo detaje dekorative jep një pamje më të thjeshtë dhe elegante.
Megjithatë, prerjet e gjera nuk janë të rezervuara vetëm për vajzat e holla. Edhe ato me forma më të plota mund t'i kombinojnë me sukses, në varësi të stilit personal.
elenakaretnikova2022
Sa ndikon gjatësia e xhaketës në pamjen e trupit?
Gjatësia është një tjetër element që ndikon në mënyrën se si duket veshja.
Xhaketat e shkurtra, që përfundojnë te beli ose pak mbi ijë, mund t'u përshtaten vajzave të holla, sidomos kur kombinohen me pantallona të gjera ose xhinse me bel të lartë.
Për vajzat me forma më të plota, modelet që arrijnë deri në mes të ijëve ose në pjesën e sipërme të kofshëve mund të krijojnë një vijë vizuale më të vazhdueshme.
Megjithatë, edhe xhaketat e gjata dhe të fryra mund të duken bukur në të gjitha llojet e trupit, veçanërisht kur kanë prerje të thjeshtë dhe mbushje jo shumë voluminoze.
Çfarë duhet të kontrolloni para se ta blini?
Përveç pamjes, rëndësi ka edhe mënyra se si xhaketa qëndron gjatë lëvizjes.
Provojeni me një pulovër të trashë, kontrolloni nëse mëngët janë të rehatshme dhe nëse mund t'i lëvizni lirshëm krahët. Shikojeni nga përpara, anash dhe prapa.
Në fund, xhaketa më e përshtatshme nuk është ajo që ndjek rregulla të ngurta për format e trupit, por ajo që ju bën të ndiheni rehat, të sigurt dhe në harmoni me stilin tuaj. /Telegrafi/
