Kina zgjat me dy muaj armëpushimin tregtar me SHBA-në, tarifat shtesë mbeten të pezulluara
Kina ka vendosur të zgjasë me dy muaj pezullimin e tarifës shtesë prej 24% për mallrat amerikane, duke shtyrë deri në janar 2027 afatin e armëpushimit tregtar me Shtetet e Bashkuara.
Vendimi hyn në fuqi më 10 nëntor, ndërsa tarifa ekzistuese prej 10% për importet amerikane do të vazhdojë të zbatohet, sipas Bloomberg.
Pekini njoftoi gjithashtu zgjatjen deri më 10 janar 2027 të pezullimit të tarifave të posaçme portuale për anijet e lidhura me SHBA-në, si dhe të disa kufizimeve për eksportin e mineraleve kritike dhe teknologjive përkatëse.
Masat pasojnë marrëveshjen e arritur në shtator në Uashington mes Presidentit amerikan, Donald Trump, dhe homologut kinez, Xi Jinping, për vazhdimin e armëpushimit tregtar.
Marrëveshja fillestare ishte arritur në tetor 2025, gjatë takimit të dy udhëheqësve në Busan të Koresë së Jugut. Në atë kohë, të dy vendet ranë dakord të pezullonin tarifat shtesë prej 24%, duke ruajtur tarifat prej 10%.
Pas takimit të shtatorit, Uashingtoni dhe Pekini propozuan një paketë uljesh reciproke tarifore me vlerë rreth 60 miliardë dollarë. Paketa, e cila ende nuk është finalizuar, përfshin produkte bujqësore amerikane me vlerë rreth 17 miliardë dollarë, bazuar në importet kineze të vitit 2024.
Autoritetet kineze njoftuan se do të vazhdojnë të ndjekin planet amerikane për zëvendësimin e disa tarifave të shpallura të pavlefshme nga gjykatat me masa të reja sipas Seksionit 301 të legjislacionit tregtar të SHBA-së.
Trump dhe Xi pritet të takohen sërish gjatë samitit të APEC në Kinë, javën e ardhshme.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.
