Ka dështuar mbledhja e Komisionit për Reformën Zgjedhore, pasi palët nuk u dakordësuan për ndryshimin e rendit të ditës, edhe pse Partia Demokratike mori pjesë në seancë. Bashkëkryetari demokrat Oerd Bylykbashi, në emër të PD-së, kërkoi që reforma të diskutohej te pika që adreson rekomandimet e OSBE-ODIHR, por nuk u arrit konsensus mbi rendin e ditës.
Demokratët mbetën në qëndrim se mbledhja nuk mund të vazhdojë pa një rend dite të dakordësuar dhe vendosën veton në favor të rekomandimeve të ODIHR. PD ka propozuar një sistem proporcional kombëtar me lista 100% të hapura dhe kërkon që edhe listat e këshillit bashkiak të jenë 100% të hapura.
Bylykbashi kërkoi që çështja që gjendej në rendin e ditës të zëvendësohej me “çështjen prioritare të rekomandimeve të ODIHR për garantimin e fushës së barabartë të garës, duke ndarë shtetin nga partia dhe ndalimin e abuzimit me pushtetin shtetëror në zgjedhje”. Ai theksoi se kjo çështje ishte hapur për diskutim në Komision gjatë muajve qershor-korrik dhe se për të ishte organizuar një tryezë e madhe konsultimi nga Komisioni, me pjesëmarrjen e partnerëve, ekspertëve ndërkombëtarë dhe shoqërisë civile. Sipas tij, përfundimi i punës mbi këtë çështje duhet të jetë prioritar dhe i kryer nga Komisioni para zgjedhjeve të 9 majit 2027.
Pas diskutimeve dhe mosmarrëveshjes mbi rendin e ditës, delegacioni i PD-së u largua nga salla. Pak minuta më vonë u larguan edhe anëtarët e Partisë Socialiste. Lajmi është raportuar nga Top Channel.