Amoniak dhe ndotje fekale në ujin e Vlorës, alarm për shëndetin e qytetarëve! Pamje tronditëse edhe nga depozitat e pallateve

Situata me cilësinë e ujit të pijshëm në qytetin e Vlorës po merr përmasa gjithnjë e më shqetësuese. Pas konstatimit të pranisë së amoniakut dhe mungesës së klorit në analizat e ujit të dy zonave të qytetit, rezultatet e analizave të tjera kanë evidentuar edhe ndotje fekale.

Korespodenti i Syri TV për Vlorën, Gentjan Këllçiu raporton se situata ngre pikëpyetje serioze mbi sigurinë e ujit që konsumojnë dhe përdorin çdo ditë banorët e qytetit bregdetar.

Pas publikimit të rezultateve të analizave, institucionet përgjegjëse kanë reaguar dhe kanë dalë në terren për të verifikuar situatën. Megjithatë, deri më tani nuk është bërë e qartë se cilat janë burimet e ndotjes, sa është përhapur problemi dhe nëse uji që furnizon familjet plotëson standardet e sigurisë.

Shqetësimi shtohet edhe më shumë nga gjendja higjieno-sanitare e depozitave të ujit në pallatet e Vlorës. Pamjet nga pastrimi i njërës prej tyre tregojnë kushte alarmante, duke ngritur dyshime mbi mënyrën se si mirëmbahet uji përpara se të mbërrijë në rubinetat e banorëve.

Problematika nuk kufizohet vetëm te përdorimi i ujit për konsum të drejtpërdrejtë. Ai përdoret çdo ditë për larjen e enëve, përgatitjen e ushqimit, dushin dhe higjienën personale, çka e bën cilësinë e tij një çështje të drejtpërdrejtë të shëndetit publik.

Prania e amoniakut dhe ndotjes fekale, e kombinuar me mungesën e klorit të konstatuar në analizat e publikuara, kërkon një verifikim të plotë dhe transparencë nga institucionet përgjegjëse.

Qytetarët presin përgjigje konkrete: A është i sigurt uji që mbërrin në banesat e tyre, cilat janë burimet e ndotjes dhe çfarë masash do të merren për të garantuar furnizimin me ujë të pastër?