Më 9 Nëntor shënohet Dita Botërore kundër Fashizmit dhe Antisemitizmit. Kjo datë nderon kujtimin e viktimave të regjimit nazist dhe tërheq vëmendjen ndaj rreziqeve të racizmit, antisemitizmit, ksenofobisë dhe ideologjive ekstremiste.
Përkujtimi lidhet me “Kristallnacht”, të njohur si Nata e Xhamit të Thyer. Më 9 dhe 10 nëntor 1938, regjimi nazist ndërmori sulme të dhunshme ndaj hebrenjve në Gjermani dhe Austri, në një prej episodeve më të errëta të historisë evropiane.
Të lidhura
None found
Gjatë asaj nate dhe ditëve në vijim, dhjetëra hebrenj humbën jetën dhe mijëra të tjerë u dhunuan. Rreth 30 mijë burra hebrenj u arrestuan dhe u çuan në kampe përqendrimi.
Sulmet lanë pas sinagoga, dyqane dhe banesa të komunitetit hebre të djegura, të plaçkitura e të shkatërruara. Xhamat e vitrinave të thyera mbuluan rrugët, duke i dhënë ngjarjes emrin me të cilin njihet sot.
Kristallnacht shënoi një kthesë në përndjekjen naziste të hebrenjve: diskriminimi dhe dhuna ndaj tyre morën përmasa të organizuara nga shteti.
Ajo që ndodhi në nëntor 1938 i parapriu shfarosjes sistematike të Holokaustit, gjatë së cilës u vranë rreth 6 milionë hebrenj.
Kujtimi i kësaj ngjarjeje shërben jo vetëm për të ruajtur historinë, por edhe për të penguar përsëritjen e tragjedive të ngjashme.
Për këtë qëllim, organizata ndërkombëtare, aktivistë dhe institucione arsimore organizojnë veprimtari ndërgjegjësuese që promovojnë tolerancën, bashkëjetesën dhe respektin për të drejtat e njeriut.
Rrjeti evropian UNITED for Intercultural Action koordinon një fushatë për të angazhuar qytetarët, shkollat dhe organizatat në kundërshtimin e ekstremizmit të djathtë dhe gjuhës së urrejtjes.
Mesazhi i kësaj dite mbetet i rëndësishëm edhe sot: shpërfillja e diskriminimit dhe urrejtjes mund të hapë rrugën për përsëritjen e historisë. Kujtesa, edukimi dhe kundërshtimi i çdo forme intolerance janë thelbësore për mbrojtjen e demokracisë dhe të drejtave të njeriut.
