Rënia e fortë e tregjeve në tetor goditi rëndë fondet mbrojtëse (hedge funds), duke i detyruar ato të mbyllin pozicionet e investimit me ritmin më të lartë në vite dhe të shkurtojnë stafin. Humbjet e pësuara lanë shumë prej tyre me rezultate thellësisht negative, edhe përpara se rënia e aksioneve të përshpejtohej të enjten.
Pasojat u ndjenë te fondet që tregtojnë gjithçka, nga aksionet e kompanive të inteligjencës artificiale dhe të sektorit të shëndetësisë, deri te borxhi i korporatave me rrezik të lartë.
Samlyn Capital, një kompani administrimi fondesh mbrojtëse që menaxhon rreth 7 miliardë dollarë, po ngushton fokusin e saj te tregtimi i aksioneve të kompanive të shërbimeve financiare. Ky ndryshim ka sjellë largimin e drejtuesve të sektorëve të tjerë dhe të anëtarëve të stafit të investimeve, sipas personave të njohur me kompaninë. Disa prej tyre thanë se fondi i Samlyn ka humbur rreth 5% këtë vit deri në fund të tetorit.
Engineers Gate, një kompani me rreth 4 miliardë dollarë, e themeluar nga Glenn Dubin, ka vendosur së fundmi të mbyllë pjesën më të madhe të strategjisë së saj “quantamental”, e cila kombinonte analizën njerëzore me atë sasiore, si dhe të shkurtojë numrin e menaxherëve të portofolit të kësaj strategjie, duke mbajtur vetëm pesë prej tyre, sipas personave të njohur me kompaninë. Drejtuesi i këtij aktiviteti, Mike Daylamani, po largohet nga kompania, thanë disa prej tyre.
Pas një fillimi të fortë të vitit, fondet mbrojtëse nisën të hasin vështirësi gjatë verës dhe përjetuan një muaj veçanërisht të vështirë në tetor, duke bërë që fitimet dyshifrore të disa fondeve të ktheheshin në humbje. Këtë javë situata u përkeqësua më tej, pasi tregjet përjetuan luhatje të forta: të mërkurën u rritën pas fitores së demokratëve, që u dha atyre kontrollin e të dy dhomave të Kongresit, ndërsa të enjten pësuan një rënie të menjëhershme.
Aksionet e kompanive të teknologjisë u goditën më rëndë, pasi investitorët u shqetësuan se rezultatet e zgjedhjeve mund të pengonin avancimin e aksioneve të lidhura me inteligjencën artificiale, përfshirë edhe ofertën publike fillestare (IPO) të shumëpritur të Anthropic. Investitorët po largohen nga këto investime më të rrezikshme dhe po orientohen drejt alternativave relativisht më të sigurta, si bonot e Thesarit amerikan dhe aksionet e kompanive mbrojtëse.
“Përqafojeni menaxherin e fondit tuaj mbrojtës”, shkroi me shaka të enjten në rrjetin social X, Dan Loeb, miliarderi themelues i Third Point, pasi rënia historike fshiu rreth 2.5 trilionë dollarë nga vlera totale e tregut e indeksit Nasdaq Composite.
Një raport i së mërkurës për klientët, i përgatitur nga Morgan Stanley, paraqiti përmasat e humbjeve për fondet mbrojtëse që investojnë në rritjen dhe rënien e aksioneve gjatë muajit të kaluar. Tetori shënoi nivelin më të lartë të mbylljes aktive të pozicioneve nga fondet mbrojtëse që përzgjedhin aksione individuale në më shumë se një dekadë. Ekspozimi i tyre ndaj tregut ka rënë me rreth 9% që nga muaji qershor.
Më shumë se 40% e fondeve që përzgjedhin aksione individuale kishin rezultate zero ose negative këtë vit deri në fund të tetorit, thuhej në raportin e Morgan Stanley. Ndërkohë, indekse më të gjera të tregut, si S&P 500 dhe Nasdaq Composite, vijojnë të jenë në territor pozitiv për këtë vit.
Performanca u përkeqësua edhe më shumë gjatë këtij muaji. Fondet mbrojtëse të përqendruara te sektorët e telekomunikacionit, medias dhe teknologjisë humbën më shumë se 4% të enjten, duke fshirë praktikisht fitimet e akumuluara që nga fillimi i vitit, të cilat para rënies së aksioneve të lidhura me inteligjencën artificiale gjatë verës kishin arritur deri në 24%, bëri të ditur Goldman Sachs në një raport për klientët të enjten. Fondet e ashtuquajtura me shumë strategji, të cilat tregtojnë në klasa të ndryshme aktivesh, humbën 1.4%, pjesërisht për shkak të humbjeve në sektorin e teknologjisë dhe në investimet e bazuara te momentumi i tregut, tha Goldman.
Gjatë javëve të fundit, kompanitë kanë shkurtuar ekipe dhe kanë mbyllur pozicione tregtimi për të menaxhuar rrezikun. Këto veprime, nga ana tjetër, vijojnë të ushtrojnë presion mbi strategjitë e njohura të investimit që mbahen nga disa fonde njëkohësisht. Shumë prej strategjive të preferuara nga fondet me shumë strategji, përfshirë tregtimin e instrumenteve me të ardhura fikse dhe investimet makroekonomike të bazuara në lëvizjet e përgjithshme të tregut, nuk kanë dhënë rezultatet e pritshme gjatë muajve të fundit.
Arini Capital Management, një fond mbrojtës që dikur shënonte performancë shumë të lartë, ka reduktuar ndjeshëm zotërimet e tij në instrumente borxhi gjatë javëve të fundit, pjesërisht për shkak të kërkesave për plotësimin e marzhit të garancisë nga bankat me të cilat kryente transaksione, raportoi The Wall Street Journal.
E enjtja mund të kishte sjellë humbje edhe më të mëdha, nëse kaq shumë fonde nuk do ta kishin reduktuar më parë përdorimin e levës financiare, pra parave të marra hua për të rritur ekspozimin ndaj investimeve, tha një drejtues banke që punon me fondet mbrojtëse.
Lone Pine Capital kishte shënuar fitime prej më shumë se 40% në fondin e saj mbrojtës gjatë gjysmës së parë të vitit, por më pas përjetoi periudhën më të keqe tremujore në tremujorin e tretë, sipas një personi të njohur me kompaninë. Në tetor, fondi humbi 8.8% përpara zbritjes së tarifave dhe tashmë ka humbur 7.5% përpara tarifave për periudhën nga fillimi i vitit deri në fund të tetorit. Kompania administronte rreth 19 miliardë dollarë asete në muajin shtator.
Në një letër drejtuar investitorëve për tremujorin e tretë, Lone Pine deklaroi se performanca e saj ishte dëmtuar nga përmbysja e fortë e tendencës së aksioneve të lidhura me inteligjencën artificiale, si dhe nga bastet kundër kompanive që i konsideronte të cenueshme ndaj ndikimit të IA-së, por që në fakt shënuan rritje, tha personi i njohur me kompaninë.
Walleye Capital gjithashtu shkurtoi këtë javë disa menaxherë portofoli që merreshin me përzgjedhjen e aksioneve, pasi përjetoi muajin më të keq që nga marsi i vitit 2020, sipas një letre drejtuar investitorëve, të siguruar nga The Wall Street Journal. Fondi me shumë strategji kishte administruar më parë asete me vlerë mbi 17 miliardë dollarë. Në një letër drejtuar klientëve, kompania tha se planifikonte t’u kthente një pjesë të parave investitorëve, pas vlerësimit të madhësisë optimale të fondit. Ky është një hap që kompanitë ndonjëherë e ndërmarrin për të përmirësuar performancën.
Engineers Gate, nga e cila Dubin u tërhoq në vitin 2020 dhe që aktualisht drejtohet nga bashkëthemeluesi Greg Eisner, kishte shënuar një rënie prej disa pikësh përqindjeje deri në fund të tetorit, tha një person i njohur me kompaninë. Persona të njohur me kompaninë thanë se ajo vijon të përqendrohet te strategjia e saj kryesore e investimit sasior.
VINI RE: Ky material është pronësi intelektuale e WSJ
