“E mbivlerësuar, lë për të dëshiruar nga ana vokale”/ Deklarata e Jonida Maliqit në ‘Goca dhe Gra’, reagon Rozana Radi: Do të ishte film nëse… 08/11 14:52
Skema e ngjyrave
Madhësia e shkrimit
Një traditë japoneze, e cila për shekuj u është kushtuar fëmijëve, po merr një kuptim të ri.
Në një faltore Shinto në Tokio, një prift bekoi një mace dhe disa qen, të veshur me kimono shumëngjyrëshe, në kuadër të festivalit tradicional “Shichi-Go-San”, një rit që zakonisht zhvillohet për fëmijët e moshës 3, 5 dhe 7 vjeç.
Gjatë ceremonisë, prifti Kenji Kaji kreu ritualin e pastrimit, duke tundur një shkop ceremonial prej druri të zbukuruar me shirita të bardhë letre dhe duke recituar lutje për shëndetin dhe jetëgjatësinë e kafshëve. Ky fenomen po bëhet gjithnjë e më i përhapur në Japoni, ku ndryshimet demografike, rënia e lindshmërisë dhe plakja e popullsisë kanë ndikuar edhe në mënyrën se si njerëzit e konceptojnë familjen.
Festivali “Shichi-Go-San”, që përkthehet “Shtatë-Pesë-Tre”, është një traditë e vjetër japoneze, gjatë së cilës familjet luten për shëndetin dhe rritjen e fëmijëve të tyre. Por vitet e fundit, gjithnjë e më shumë pronarë po zgjedhin t’i përfshijnë në këtë ceremoni edhe kafshët e tyre shtëpiake.
Një prej tyre është Shoko Kodama, 46 vjeçe, e cila mori pjesë në ritual me macen e saj Amber. Ajo tregoi për AFP se kishte kaluar dy muaj duke përgatitur me dorë një kimono të kuqe të ndezur për kafshën e saj, të cilën e konsideron si vajzën e saj.
“Erdha këtu për t’u lutur që kafsha ime të rritet e shëndetshme dhe mirë”, tha ajo, duke shtuar se prania e Amberit i jep forcë për të përballuar vështirësitë e jetës.
Edhe jashtë faltores, atmosfera ishte festive. Pronarët i kishin veshur qentë dhe macet me veshje tradicionale japoneze, ndërsa nuk munguan fotografitë për të përkujtuar këtë ditë të veçantë. Më pas, kafshët u dërguan brenda faltores, ku morën bekimin nga prifti.
Sipas Kenji Kajit, ndryshimi i rolit të kafshëve shtëpiake lidhet ngushtë me transformimin e strukturës familjare në Japoni. Ai vuri në dukje se gjithnjë e më shumë njerëz, qofshin pa fëmijë apo me fëmijë tashmë të rritur, po i konsiderojnë qentë dhe macet si anëtarë të mirëfilltë të familjes.
Faltorja e tij e organizon këtë ceremoni për kafshët që prej fillimit të viteve 2000 dhe çdo vit mirëpret rreth 400 familje, të cilat dëshirojnë të marrin bekimin tradicional për miqtë e tyre katërputroshë.
Miyu Shiro, 23 vjeçe, e cila mori pjesë në festival me dy qentë e saj Yorkshire Terrier, tha se për të ishte krejtësisht e natyrshme t’i përfshinte ata në këtë traditë.
“Ata janë pjesë e familjes sonë”, u shpreh ajo, ndërsa fotografonte dy qentë e veshur me kujdes dhe të zbukuruar me kapëse flokësh në formë lulesh.
Ndërkohë, të dhënat demografike tregojnë se Japonia po përballet me një krizë gjithnjë e më të thellë të lindshmërisë. Shkalla e fertilitetit shënoi një tjetër rekord negativ vitin e kaluar, duke theksuar sfidat me të cilat përballet ekonomia e katërt më e madhe në botë.
Me një moshë mesatare prej 49.9 vjeç, Japonia ka popullsinë e dytë më të vjetër në botë, pas Monakos, sipas të dhënave të Bankës Botërore.
Megjithatë, për disa pronarë, dashuria për kafshët nuk lidhet domosdoshmërisht me mungesën e fëmijëve. Koichi Ohara, 57 vjeç, i cili mori pjesë në festival me bashkëshorten dhe tre qentë e tij Chihuahua, tregoi se kafshët i japin dashuri të pakushtëzuar.
“Ata janë më të dashur se fëmijët njerëzorë dhe dëgjojnë atë që u themi”, tha ai me humor, duke zbuluar se ka edhe tre fëmijë. Ai shtoi se shpreson që, ashtu si njerëzit, edhe kafshët e tij të jetojnë gjatë dhe në paqe.
Top Channel
