Presidenti i Paraguait shkarkohet dhe arrestohet pas kolapsit të bankës, miliona qytetarë humbin kursimet e tyre
Presidenti i Paraguait, Santiago Peña, është shkarkuar nga detyra dhe vendosur në arrest shtëpie, pas një krize të rëndë financiare të shkaktuar nga kolapsi i bankës Ueno. Vendimi erdhi të premten, pasi 44 nga 45 senatorët votuan në favor të shkarkimit të tij, përfshirë edhe ligjvënës nga partia e tij. Peña kishte ofruar dorëheqjen një ditë më parë, por Senati vendosi të vijonte me procedurën e shkarkimit dhe ngritjen e akuzave për shkelje të detyrës.
Kriza shpërtheu pas kolapsit të bankës Ueno, e cila u mor nën kontroll nga Banka Qendrore e Paraguait. Rënia e institucionit financiar la rreth tre milionë depozitues pa akses në kursimet dhe pensionet e tyre, duke shkaktuar zemërim të madh në vend. Peña, i cili deri vitin e kaluar zotëronte aksione në kompaninë që kishte bankën, ka mohuar çdo përfshirje në shkelje.
Akuzat që çuan në shkarkimin e presidentit përfshijnë konflikt interesi, manipulim të mbikëqyrjes rregullatore, devijim të fondeve të pensioneve dhe përpjekje për të mbuluar përgjegjësitë institucionale në bashkëpunim me Bankën Qendrore. Prokurorja Silvia Margarita Gonzalez Vester bëri të ditur se Peña pritet të merret në pyetje për dyshimet mbi shpërdorimin e besimit, ushtrimin e ndikimit të paligjshëm dhe përvetësimin e fondeve.
Pas shkarkimit, zëvendëspresidenti Pedro Alliana bëri betimin si president i përkohshëm dhe premtoi se qytetarët e prekur nga kriza do të kompensohen plotësisht. Ai do të qëndrojë në këtë detyrë deri në vitin 2028. Ndërkohë, mijëra qytetarë kanë dalë në protesta në disa qytete të vendit, duke kërkuar rikthimin e parave të tyre. Në demonstratat e mëparshme janë regjistruar përplasje me policinë, e cila ka përdorur gaz lotsjellës dhe ujë me presion për shpërndarjen e turmave.
Peña njoftoi dorëheqjen përmes një videoje të publikuar në rrjetin social X, ku deklaroi se nuk kishte pasur kurrë qëllim të tradhtonte besimin e qytetarëve. Megjithatë, kryetari i Senatit, Basilio Núñez, bëri të ditur se ish-presidenti u shpall fajtor për neglizhencë në ushtrimin e detyrës. Ndërkohë, senatori Rafael Filizzola e cilësoi ngjarjen si skandalin më të madh të korrupsionit në historinë demokratike të vendit.
Avokati mbrojtës i Peña-s, Ricardo Preda, i ka cilësuar akuzat si të pamatura dhe të papërgjegjshme, ndërsa analistët parashikojnë se ish-presidenti mund të përballet me procedime të mëtejshme penale lidhur me kolapsin e bankës. Kriza ka tronditur besimin e qytetarëve te sistemi financiar dhe institucionet shtetërore të Paraguait.
/vizionplus.tv
