Edhe Shoqata Gjermane e Industrisë dhe Tregtisë në Shqipëri, DIHA ka rezerva për paketën fiskale të propozuar nga qeveria. Përmes një deklarate, DIHA shpreh keqardhjen që komuniteti i biznesit nuk u përfshi në procesin e hartimit të paketës. Projektligjet nuk u publikuan për konsultim publik, siç parashikohet nga legjislacioni për njoftimin dhe konsultimin publik, ndërsa tekstet përfundimtare iu paraqitën Këshillit Tatimor vetëm pak kohë përpara dorëzimit në Parlament. Ndryshime të kësaj natyre dhe përmase, thuhet në deklaratë, kërkojnë më shumë kohë për konsultime dhe periudha të arsyeshme nga hyrja në fuqi për t’u mundësuar bizneseve që të përgatiten me barrën e re fiskale. DIHA mirëpret masat për lehtësimin e barrës fiskale për familjet dhe punonjësit, por thotë se ulja e TVSH nuk garanton që ky lehtësim do të shkojë të qytetari.