“Jam i pastrehë me qenin tim”, aktori i njohur nis luftën me motrën për pasurinë miliona paund të nënës së tyre

Bëhet fjalë për Robert Rajhpaul, i cili kundërshton testamentin e fundit të nënës së tij, Milda Rajhpaul, duke pretenduar se motra e tij, Precious, ushtroi presion mbi të ëmën për të ndryshuar dokumentin dhe për ta përjashtuar atë nga trashëgimia.

Pasuria familjare vlerësohet deri në 1.2 milionë paund, ku pjesën kryesore e përbën një banesë në perëndim të Londrës, me vlerë rreth 900 mijë paund. Sipas testamentit të përditësuar në gusht të vitit 2023, vetëm një vit para vdekjes së Mildës, e gjithë pasuria iu la vajzës së saj, Precious, e cila ishte kujdesur për nënën gjatë viteve të fundit të jetës.

Robert pretendon se motra e tij e kishte izoluar nënën nga pjesa tjetër e familjes, duke ndërprerë kontaktet me të afërmit. Gjatë seancës në Gjykatën e Qarkut të Londrës Qendrore, Robert, i cili u paraqit pa avokat, deklaroi se aktualisht ndodhet në një situatë të vështirë ekonomike dhe po qëndron në një strehim të përkohshëm për personat e pastrehë, së bashku me qenin e tij, Twinkle. Ai pretendon se motra i ndërroi bravat e shtëpisë së nënës dhe nuk lejoi asnjë pjesëtar tjetër të familjes ta vizitonte.

“Precious ndërroi bravat e derës dhe nuk lejoi asnjë anëtar të familjes të takonte nënën time. Ajo hoqi edhe linjën telefonike, sepse e dinte që nëna ime po përpiqej të transferonte një pjesë të pronës në emrin tim”, deklaroi ai para gjykatës.

Robert kundërshton vlefshmërinë e testamentit të vitit 2023, duke pretenduar se nëna e tij nuk kishte aftësinë e nevojshme mendore për të marrë një vendim të tillë, nuk ishte në dijeni të plotë të përmbajtjes së dokumentit dhe se ai ishte hartuar nën ndikim të padrejtë. Ai ka ngritur gjithashtu pretendime lidhur me ceremoninë mortore, duke akuzuar motrën se organizoi kremimin e trupit të nënës, pavarësisht dëshirës së saj për t’u varrosur në një ceremoni të krishterë pranë bashkëshortit.

Përveç testamentit, dy vëllezërit dhe motrat janë përfshirë edhe në një debat për shumën e parave që nëna kishte lënë në llogaritë bankare. Të dy bien dakord se banesa familjare ka një vlerë prej rreth 900 mijë paundësh, por kanë pretendime të ndryshme për pasurinë në para. Precious pretendon se nëna kishte lënë vetëm 16,530 paund në para të gatshme, ndërsa Robert këmbëngul se shuma reale arrinte në 315 mijë paund.

Aktori ka paraqitur gjithashtu një kërkesë në bazë të ligjit britanik të trashëgimisë të vitit 1975, duke argumentuar se ishte financiarisht i varur nga nëna dhe se kishte të drejtë të përfitonte një mbështetje të arsyeshme nga pasuria e saj. Nga ana tjetër, Precious i ka hedhur poshtë akuzat e vëllait dhe po mbron vlefshmërinë e testamentit. Ajo ka paraqitur edhe një kundërpadi për të kërkuar njohjen e tij si dokument ligjërisht të vlefshëm.

Avokatja e saj, Nicola Phillipson, argumentoi se pretendimet e Robert nuk kanë baza të mjaftueshme dhe se ai nuk ka paraqitur prova mjekësore apo dokumentacion të detajuar për të mbështetur akuzat.

Nga skena e teatrit te beteja për trashëgiminë

Robert ka treguar se pasioni për aktrimin nisi që në fëmijëri. Një prej aktoreve të filmave të njohur britanikë “Carry On”, Hattie Jacques, kishte ardhur për të parë shfaqjen e tij shkollore të Krishtlindjeve, ku ai interpretonte një nga tre dijetarët.

Më vonë, ai u formua në akademinë e njohur të artit dramatik RADA dhe në Actors Studio në Pinewood, duke marrë gjithashtu kualifikime në luftimin skenik, përdorimin e armëve dhe kalërim. Megjithatë, sot jeta e tij është larg skenave të teatrit dhe kinemasë. Ai thotë se po përballet me vështirësi të mëdha financiare dhe kërkon që gjykata t’i njohë të drejtën për të përfituar nga pasuria e nënës.

Gjykatësi Nigel Gerald vendosi ta shtyjë çështjen, në mënyrë që Robert të ketë mundësi të sigurojë përfaqësim ligjor për të paraqitur pretendimet e tij përpara se të vendoset nëse çështja do të kalojë në një proces të plotë gjyqësor.

Gjykatësi e paralajmëroi se akuzat që po ngre janë shumë serioze dhe se procesi mund të jetë i kushtueshëm. Ai shtoi se, nëse nuk do të paraqiten prova të mjaftueshme për të mbështetur çështjen, mund ta rrëzojë padinë. Për momentin, beteja për trashëgiminë prej 1.2 milionë paundësh mbetet e hapur, ndërsa përplasja mes dy fëmijëve të Mildës pritet të vijojë në gjykatë.

Top Channel