“Me Chivu komunikojmë çdo ditë dhe në grup nuk ka asnjë mollë të kalbur…” Pas disa ditëve të vështira, pas humbjes në derbi, presidenti i Interit, Beppe Marotta, largoi çdo dyshim mbi skuadrën dhe profesionalizmin e Lautaros me shokë.

“Sa iu përket rinovimeve, nuk jemi në ankth. I vetmi lojtar që ka kontratën drejt përfundimit në qershor është Calhanoglu dhe marrëdhënia jonë me të është shumë e mirë. Dimarco e ka të sigurt qëndrimin deri në vitin 2028, pasi aktivizuam me marrëveshje klauzolën e zgjatjes. Gjatë këtij viti do të rinovojë sërish me Interin. Ai dëshiron të qëndrojë dhe ne duam ta mbajmë”.

Në fund, Marotta foli edhe për sulmin dhe mundësinë e rikthimit të Mauro Icardit: “Icardi? Ai nuk na është ofruar kurrë. Mauro i ka dhënë shumë Interit, por nuk bën pjesë në planet tona. E njëjta gjë vlen edhe për afrimin e një sulmuesi në janar. Nuk kemi problem me golat. Chivu është një trajner modern, që di të nxjerrë më të mirën nga të gjithë lojtarët që ka në dispozicion”.