Paketa fiskale dhe ndryshimet e shpeshta të taksave rrezikojnë klimën e biznesit dhe investimet e huaja në Shqipëri.
Në një intervistë për Syri TV, Massimiliano Adilardi, kreu i “Fratelli d’Italia” në Tiranë, ekspert financash dhe investitor, paralajmëron se mungesa e stabilitetit fiskal mund t’i shtyjë kompanitë italiane të zhvendosin investimet drejt Kosovës dhe vendeve të tjera të rajonit.
Adilardi kritikon qeverinë Rama për mungesën e konsultimit me sipërmarrjen dhe kundërshton rritjen e TVSH-së standarde nga 20% në 21%, duke paralajmëruar se kjo masë mund të nxisë më tej inflacionin dhe të rëndojë konsumatorët shqiptarë.
Ai vë në pikëpyetje edhe uljen e TVSH-së për produktet ushqimore në 6%, duke theksuar se kjo nuk garanton uljen e çmimeve në treg.
Sipas tij, në vend të kësaj mase, qeveria duhet të krijojë një shportë me produkte bazë dhe çmime të fiksuara, në mënyrë që lehtësimi të mbërrijë realisht te qytetarët.
“Atëherë, le të bëjmë një hyrje ose të themi një parashtrim të përgjithshëm. Ndodhemi në një kontekst ndërkombëtar shumë të vështirë, kështu që sigurisht nga njëra anë është popullsia, dhe këtë e shohim edhe në Itali, që vuan gjithmonë sepse është duke vuajtur. Por nga ana tjetër kemi një qeveri, qoftë shqiptare, qoftë italiane, po e kemi parë në shumë pjesë të Evropës, në vende që duhet të marrin përsipër përgjegjësi.
Por edhe duhet t’i marrë këto me një vizion të caktuar dhe ekuilibër. Sipas nesh, edhe si Confindustria, jemi ballafaquar tashmë dhe këto zgjedhje nga ana e qeverisë që duhet të konfirmohen nga parlamenti, të miratohen, sipas nesh nuk po shkojnë në drejtimin e duhur. Kemi vlerësuar faktin që është mbajtur fikse, e palëvizur, për shembull përqindja për tatimin për dividentin. Këto masa që po merren, mendoj që nuk jemi të bindur për një sërë faktorësh.
Pikërisht sepse në këto momente, sipas nesh, është e rëndësishme t’i japim një qëndrueshmëri, stabilitet, dhe jo të bëjmë rritje diskriminuese ose të forta, të cilat mund të shkaktojnë më pas një sërë reagimesh. Dhe në disa raste, me këtë paketë fiskale nuk do të sillnin as ato avantazhet që njerëzit presin. Të paktën ky është mendimi ynë. Sipas nesh, ideja jonë është ajo që të propozojmë një tryezë, me ekspertët e ministrisë, dhe të propozojmë disa zgjidhje të tjera të cilat mund të jenë sigurisht më të leverdisshme. Sidomos, jo vetëm për ndërmarrjet, por edhe për popullin shqiptar, sepse çështja duhet parë në kompleks, pra si vend, si Shqipëri.
Do të doja të shtoja edhe këtë gjë, që duhet marrë parasysh edhe situata e vendeve të tjera ballkanike. Kur bëhet një paketë e tillë, duhet edhe të krahasohemi me vendet e tjera, për shembull Mali i Zi, Kosova, Maqedonia e Veriut. Jo vetëm, por edhe Greqia.
Sepse vendet e tjera kanë qoftë ato përqindjet më të ulëta fiskale, por edhe kanë një stabilitet, një qëndrueshmëri. Pra, këto përqindje nuk ndryshojnë nga viti në vit ose me shumë shpejtësi. Ndërsa në Shqipëri nuk ndodh kështu, kemi një ndryshim të shpejtë të tyre. Kjo nga pikëpamja e sipërmarrësve, zëmë po flasim për italianët, ku po ulet fuqia e euros, ose prania e punonjësve të gjuhës italiane në Shqipëri, sepse të rinjtë shqiptarë flasin kryesisht anglisht, krijon vështirësi.
Në qoftë se ne pastaj do prekim edhe aspektin fiskal tatimor në këtë mënyrë jo të kujdesshme, atëherë do të kemi një sërë faktorësh të cilët do të bëjnë që kompanitë italiane, në vend që të investojnë në Shqipëri, do të shkojnë të investojnë në Kosovë, ose në vende të tjera. Kështu që kur bëhet një paketë fiskale, gjëja e rëndësishme është që të bashkëndahen këto zgjedhje më përpara me shoqatat e kategorive. Të verifikohen, sepse mund të gjenden me lehtësi zgjidhje të tjera përmirësuese për të gjithë. Pra, mos të shkatërrojnë, mos të prishin bizneset.
Kjo do të kishte qenë gjëja më e mirë. Edhe sepse, unë mbaj mend që qeveria na premtoi një stabilitet nga kjo pikëpamje. Nga momenti që ti ndryshon, dhe ne e kuptojmë arsyen e ndryshimeve, sepse ndodhemi në një moment ku ka vështirësi të mëdha, ka luftëra, mund të kuptojmë ndryshimin dhe nevojën për t’u përshtatur. Por pikërisht sepse na ishte premtuar një stabilitet i tillë, duhej diskutuar më përpara me qetësi, dhe të gjendeshin zgjidhje më të mira.
Le t’i thellojmë që t’i kuptojmë më mirë. Sigurisht që e prishin për botën e sipërmarrjeve. Por nuk arrijnë as në disa raste objektivin e duhur. Flasim për shembull, për uljen e TVSH-së mbi disa artikuj ushqimorë. A jemi vërtet të sigurt që ky pakësim do jetë vërtet në përfitim të popullsisë? Unë do të kisha zgjedhur ndryshe, për shembull, një shportë me çmime të bllokuara. Jo me TVSH nga 22 në 6, por do kisha bërë një shportë me produkte me çmim të fiks. Këtu nuk kemi pastaj çështjen e inflacionit dhe gjithë kostove të zinxhirit. Kjo ngjarje nuk na garanton, sepse kemi një treg të lirë. Në qoftë se unë si prodhues shtoj çmimin e mallit duke e mbajtur TVSH-në në 6 përqind, në fund të fundit konsumatorit nuk i vjen asnjë përfitim. Një tjetër vërejtje është mbi rritjen e TVSH-së. Në qoftë se shkon nga 20 në 21, jemi në një periudhë të rritjes së inflacionit, kështu që efektet janë negative sepse ndihmon rritjen e inflacionit.”- deklaron ai.
