Tre persona të tjerë, pjesë e të ashtuquajturit “Grupi i Intelektualëve”, të rrëmbyer nga forcat serbe gjatë luftës në Kosovë, janë identifikuar pas më shumë se 27 vitesh nga zhdukja e tyre.
Lajmi është bërë i ditur nga kryeministri Albin Kurti, i cili njoftoi se Komisioni Qeveritar për Persona të Zhdukur ka marrë raportet e reja të analizave të ADN-së. Përmes tyre është konfirmuar identiteti i Adem (Fazli) Ademit, Fatmir (Bajram) Fazliut dhe Ali (Islam) Halitit.
Tre familjet janë njoftuar tashmë për identifikimin e të afërmve të tyre. Sipas autoriteteve, mbetjet mortore janë zbuluar gjatë gërmimeve të zhvilluara në Kalludër dhe Jabukë, në komunën e Zubin-Potokut.
Bëhet fjalë për pjesëtarë të grupit të shqiptarëve, kryesisht nga rajoni i Skenderajt dhe Mitrovicës, të cilët u rrëmbyen më 19 prill 1999 dhe u zhdukën gjatë luftës.
Gjatë fundit të korrikut dhe muajit gusht 2026, në dy vendndodhjet në Zubin-Potok u kryen gërmime, ku u zbuluan mbetje mortore që u përkasin 23 personave. Procesi i identifikimit po vijon përmes analizave gjenetike.
Kurti shprehu ngushëllimet për familjet dhe theksoi se zbardhja e fatit të personave të zhdukur me dhunë mbetet prioritet i institucioneve të Kosovës. Ai përsëriti gjithashtu kërkesën për drejtësi për krimet e kryera gjatë luftës dhe akuzoi Serbinë se vijon të mohojë përgjegjësinë dhe të fshehë dokumentacionin përkatës.
