Ndreca: Toni Gogu vizitoi Veliajn në burgun e Fierit, i përcolli mesazhin e Ramës për dorëzimin e mandatit dhe largimin e avokatit
Avokati mbrojtës i Erion Veliajt, Plarent Ndreca, ka konfirmuar për BalkanWeb dhe News24 se ministri i Drejtësisë, Toni Gogu, ka zhvilluar një vizitë urgjente në burgun e Fierit mbrëmjen e 30 tetorit. Sipas pretendimeve të bëra publike nga avokati, vizita nuk është regjistruar në dokumentacionin e institucionit të vuajtjes së dënimit.
Gogu raportohet se ka mbërritur në burg i veshur sportiv dhe me një kapele në kokë. Ai ka takuar Veliajn në dhomën e izolimit dhe, sipas versionit të përcjellë nga Ndreca, i ka thënë se kishte ardhur me porosi të kryeministrit Edi Rama për t’i komunikuar disa mesazhe.
Ministri i ka përcjellë Veliajt një ultimatum me katër kërkesa: dorëzimin urgjent të mandatit, delegimin e pushtetit te emrat që do të përcaktonte Rama, si dhe ndërprerjen e marrëdhënies me avokatin Plarent Ndreca.
Në mesazhin që, sipas avokatit, Gogu i ka përcjellë në emër të kryeministrit, thuhet:
“Është hera e fundit që po të drejtohem si babai yt politik, nga sot e tutje do të drejtohem vetëm si kryeministër.
- Dorëzo mandatin urgjentisht.
- Delego pushtetin te emrat që do të them unë.
- Hiq dorë nga avokati Plarent Ndreca.
Në të kundërt, do të transferoj te burgu 302 dhe do orientoj SPAK-un të nisë hetime për minim të rendit kushtetues dhe do të të kalb në burg”.
Sipas Ndrecës, Veliaj i është përgjigjur menjëherë ministrit, duke refuzuar kërkesat dhe presionin e pretenduar.
“Edhe sikur 100 vite burg të bëj, nuk ia marr fytyrën fëmijëve të mi”, mësohet t’i ketë thënë Veliaj ministrit Gogu.
Takimi ka zgjatur vetëm pak minuta. Sipas avokatit, Veliaj ka mundur të komunikojë me të vetëm mëngjesin e sotëm, duke i treguar detajet e vizitës.
Pretendimet ngrenë pikëpyetje mbi rrethanat e vizitës së ministrit në burg dhe mesazhin që, sipas avokatit, është përcjellë në emër të kryeministrit, veçanërisht për përmendjen e SPAK-ut në kontekstin e presionit të pretenduar ndaj Veliajt.
Kryebashkiaku i Tiranës ndodhet në burg që prej 10 shkurtit 2025. a.b
