Belinda Balluku dhe avokati i saj, Ardian Kalia, janë paraqitur sot në Prokurorinë e Posaçme (SPAK), ku janë njohur me vendimin për përfundimin e hetimeve ndaj ish-zëvendëskryeministres.
Sipas gazetares Anila Hoxha, numri i personave të marrë si të pandehur në këtë çështje është i lartë. Ballukut i janë komunikuar akuzat javën e kaluar, ndërsa sot është njohur me vendimin për mbylljen e fazës hetimore.
Më 20 tetor, në përfundim të afatit të zgjatur të hetimeve, Prokuroria e Posaçme i komunikoi Ballukut akuzat dhe vendimin për zgjatjen e afatit të hetimeve.
Ish-zëvendëskryeministrja akuzohet për shkelje të barazisë së pjesëmarrësve në tendera apo ankande publike, në bashkëpunim, në nëntë raste, sipas neneve 258/2 dhe 25 të Kodit Penal.
Gjithashtu, ndaj saj janë ngritur akuzat për korrupsion pasiv të personave që ushtrojnë funksione publike, sipas nenit 259, dhe korrupsion pasiv të funksionarëve të lartë shtetërorë ose të të zgjedhurve vendorë, sipas nenit 260 të Kodit Penal.
Balluku akuzohet edhe për refuzim të deklarimit, mosdeklarim, fshehje ose deklarim të rremë të pasurive dhe interesave privatë, në dy raste, si dhe për pastrim të produkteve të veprës penale ose të veprimtarisë kriminale, në rrethana cilësuese, në bashkëpunim dhe më shumë se një herë, lidhur me dy pasuri të paluajtshme.
Burime të ndryshme konfirmojnë se Balluku nuk ka pranuar të japë shpjegime gjatë procedurave në SPAK.a.b
