Kryetari i PD-së, Sali Berisha, ka akuzuar policinë për dhunë të rëndë ndaj protestuesve gjatë protestës së opozitës në Tiranë, duke deklaruar se efektivët e forcave “Shqiponja” dhe RENEA-s do të mbajnë përgjegjësi ligjore për veprimet e tyre.
Në një deklaratë për mediat, afër mesit të natës Berisha tha se kryeqyteti përjetoi një ditë dhe natë terrori, ndërsa ngriti akuza për përdorim të paligjshëm të armëve të zjarrit, plagosje të protestuesve dhe arrestime të paligjshme.
Ai përmendi rastin e Erjon Vishkurtit, i cili humbi syrin gjatë protestës, si dhe plagosjen e protestuesve të tjerë.
“Erjon Vishkurti humbi syrin. I diplomuar në gazetari, ndërkohë që në absolute nuk po kryente asnjë veprim të dhunshëm ndaj askujt. Në sy u plagos një protestuese paqësore tjetër, mbi vetull u godit me plumb një protestues tjetër, në abdomen me plumb, që duhet heq në operacion. Akte barbare”, deklaroi Berisha.
Kreu i PD-së përmendi edhe rastin e 40-vjeçarit Lorenco Bezani, për të cilin tregoi se u dhunua barbarisht nga efektivët e policisë.
Sipas Berishës, dhjetëra persona të tjerë janë dhunuar dhe shoqëruar me forcë në komisariate, ndonëse, sipas tij, nuk kishin lidhje me protestën.
Ai ngriti gjithashtu akuza për sjellje seksuale të papërshtatshme nga efektivë policie ndaj vajzave që shoqërohen me automjete policie.
Berisha paralajmëroi se, pas largimit të kryeministrit Edi Rama nga pushteti, efektivët që kanë kryer shkelje dhe krime do të përballen me drejtësinë.
“Unë i garantoj shqiponjat e Edi Ramës, banditë të Edi Ramës, shqiponja apo çfarëdo jenë, se akti i parë i përmbysjes, i largimit të padronit të tyre, ato një për një do të përgjigjen para ligjit për krime të shëmtuara”, u shpreh kryetari i PD-së.
Ai shtoi se shërbimi “Shqiponja”, sipas tij, do të shpërbëhet dhe se çdo efektiv do të procedohet në bazë të veprave penale që mund të ketë kryer.
Berisha e cilësoi policinë si një strukturë që po përdoret për të mbajtur në pushtet kryeministrin Rama, duke përsëritur akuzat për dhunë dhe arrestime të paligjshme gjatë protestës.a.b
