Protesta në Poloni kundër bllokimit të reformave të ligjit për abortin

Gratë në Poloni po protestojnë në më shumë se 20 qytete kundër kufizimeve në aksesin ndaj abortit falas dhe ligjor.

Protestuesit akuzojnë qeverinë liberale të kryeministrit Donald Tusk se nuk ka përmbushur premtimin për të lehtësuar ligjet e rrepta të abortit në vend, pavarësisht se parlamenti miratoi dy projektligje të martën që synonin lehtësimin e rregullave. Të dyja masat pritet të përballen me veton e presidentit konservator Karol Nawrocki.

Zofia Marcinek e grupit të të drejtave riprodhuese me seli në Varshavë, Abortion Dream Team, e përshkroi legjislacionin si një seri “gjestesh simbolike” dhe jo si një përpjekje të vërtetë për reformë, duke argumentuar se qeveria ishte në dijeni se projektligjet nuk kishin gjasa t’i mbijetonin një vetoje presidenciale.

Ajo akuzoi qeverinë se po përpiqet të rifitojë mbështetjen e grave përpara zgjedhjeve parlamentare të vitit të ardhshëm, duke u dukur sikur po ndërmerr veprime për të drejtat e abortit.

Parlamenti i Polonisë votoi të martën për të lehtësuar ligjet e rrepta të vendit për abortin, të cilat janë ndër më kufizueset në Bashkimin Evropian.

Projektligji i parë, i propozuar nga Koalicioni Qytetar (KO) i Tusk dhe e Majta, do të dekriminalizonte pjesërisht abortin dhe do të hiqte dënimet penale për ndihmën ndaj dikujt për ta kryer një të tillë, një vepër penale që aktualisht dënohet deri në tre vjet burg.

Projektligji i dytë, i prezantuar nga partnerët më konservatorë të koalicionit Polonia 2050 dhe Partia Fshatare Polake (PSL), do të përmbyste efektet e një vendimi të Gjykatës Kushtetuese të vitit 2020 që ndalonte abortin në rastet e anomalive të rënda fetale.

Projektligji i parë u miratua me 217 vota pro, 213 kundër dhe tre abstenime, ndërsa i dyti u miratua me 233 vota pro, 203 kundër dhe një abstenim.