Eurodeputeti gjerman Michael Gahler ka reaguar për protestat në Shqipëri, duke ngritur shqetësime për lidhjet mes shtetit, partisë në pushtet dhe krimit të organizuar, si dhe për korrupsionin që, sipas tij, po ngre pikëpyetje mbi perspektivën evropiane të vendit.
Gahler, zëdhënës për politikën e jashtme i Grupit të Partisë Popullore Evropiane (PPE) në Parlamentin Evropian, thekson se gjatë drejtimit të delegacionit të vëzhguesve të zgjedhjeve të Parlamentit Evropian ka dëshmuar nga afër problematikat që shqetësojnë Shqipërinë.
“Duke drejtuar delegacionin e vëzhguesve të zgjedhjeve të Parlamentit Evropian (PE), kam dëshmuar lidhjet mes shtetit, partisë në pushtet dhe krimit të organizuar. Kam parë se prej sa kohësh qytetarët protestojnë kundër korrupsionit dhe qeverisë, duke ngritur shqetësime që prekin thelbin e perspektivës së integrimit evropian të Shqipërisë”, shkruan eurodeputeti në një reagim të publikuar në rrjetin social X.
Reagimi i Gahler vjen në një kohë kur protestat kundër qeverisë vijojnë në Shqipëri, ndërsa studentët dhe qytetarë të tjerë kanë ngritur zërin kundër korrupsionit dhe kanë kërkuar dorëheqjen e kryeministrit Edi Rama. a.b
