Nënkryetari i Partisë Demokratike, Belind Këlliçi, ka reaguar përmes një postimi në rrjetet sociale për 100 ditët e protestave kundër qeverisë së Edi Ramës, duke e cilësuar këtë periudhë si një nga lëvizjet më të fuqishme të shoqërisë shqiptare kundër korrupsionit dhe qeverisjes së keqe.
Këlliçi shprehet se rezistenca qytetare ka sjellë ndryshime të rëndësishme, duke pretenduar se pas 100 ditësh protestë qytetarët janë më të fortë dhe më të vendosur për të kërkuar të drejtat e tyre.
Sipas tij, protestat kanë ekspozuar atë që e cilëson si “portretin e vërtetë” të Edi Ramës, ndërsa propaganda e qeverisë është dobësuar.
“Pas 100 ditëve rezistencë, sot qytetari është më i fortë, ka më shumë kurajo, ngre zërin dhe kërkon të drejtat e tij, ndërsa autokrati është më i dobët”, shkruan Këlliçi.
Nënkryetari i PD-së thotë se kërkesa për largimin e Ramës nga pushteti mbetet e pandryshuar, ndërsa vlerëson se protestat kanë rritur presionin ndaj SPAK-ut dhe drejtësisë së re për të vepruar ndaj kryeministrit dhe aferave të qeverisë.
“Ditët e fundit, sheshi dhe bulevardi ka nisur të kërkojë llogari dhe të nxisin SPAK-un e drejtësinë e re të veprojë ndaj Edi Ramës dhe aferave të tij”, shprehet ai.
Këlliçi e lidh këtë zhvillim edhe me kauzat e opozitës, duke thënë se denoncimet e Partisë Demokratike për korrupsionin, narkoshtetin, varfërinë, problemet në shëndetësi dhe rritjen e çmimeve tashmë po gjejnë, sipas tij, mbështetje më të gjerë në shoqëri.
Ai ka vlerësuar gjithashtu rolin e diasporës shqiptare në mbështetje të protestave, duke përmendur shqiptarët në SHBA dhe në Europë.
Në përfundim të reagimit të tij, Këlliçi shprehet optimist për vijimin e protestave dhe për kauzën e opozitës.
“Sot më shumë, nesër më shumë. Kauza e drejtë do triumfojë”, shkruan ai.a.b
