Kongresmeni amerikan Robert Aderholt një ndër ikonat republikane të Kongresit Amerikan ka reaguar përmes një postimi në rrjetin social X lidhur me protestat dhe përshkallëzimin e situatës në Shqipëri, duke kërkuar respektimin e shtetit ligjor, përgjegjshmëri institucionale dhe garantimin e të drejtave të protestuesve paqësorë.
“Jam thellësisht i shqetësuar nga përshkallëzimi i trazirave në Shqipëri, një vend aleat i NATO-s. Populli shqiptar meriton sundimin e ligjit, institucione që mbajnë përgjegjësi dhe lirinë për të bërë që zëri i tij të dëgjohet”, shkruan Aderholt.
Ai u ka bërë thirrje të gjitha palëve të refuzojnë dhunën, ndërsa thekson se qeveria duhet të respektojë të drejtat e qytetarëve që protestojnë në mënyrë paqësore.
“Të gjitha palët duhet ta refuzojnë dhunën, ndërsa qeveria duhet t’i respektojë të drejtat e protestuesve paqësorë. Të rinjtë e Shqipërisë meritojnë të kenë një zë në përcaktimin e së ardhmes së kombit të tyre”, deklaron kongresmeni amerikan.
Robert Aderholt është anëtar i Dhomës së Përfaqësuesve të Kongresit amerikan dhe pjesë e Komitetit për Ndarjet Buxhetore, që mbikëqyr financimin e qeverisë federale. Ai drejton nënkomitetin për Punën, Shëndetësinë dhe Shërbimet Njerëzore dhe Arsimin, si dhe është anëtar i nënkomiteteve për Bujqësinë dhe Mbrojtjen.
Reagimi i tij vjen në një moment tensionesh të larta në Shqipëri, pas përplasjeve mes protestuesve dhe policisë, si dhe raportimeve për përdorim të gazit lotsjellës, ujit me presion dhe municioneve kinetike gjatë ndërhyrjeve të forcave të rendit.
