Deputeti i Partisë Demokratike, Klevis Balliu, ka akuzuar kryeministrin Edi Rama se ka urdhëruar përfshirjen e forcave speciale RENEA në protestë, me qëllim shtimin e dhunës dhe presionit ndaj protestuesve.
Në një deklaratë për mediat, Balliu tha se përfshirja e RENEA-s në protesta është në kundërshtim me ligjin, pasi këto forca parashikohen të përdoren për neutralizimin e elementëve kriminalë dhe jo për përballjen me protestuesit.
“Me sa duket Rama i sheh si kriminelë të rinjtë e Shqipërisë vetëm për faktin se kërkojnë largimin e tij”, deklaroi deputeti demokrat.
Balliu tha se, sipas raportimeve mediatike dhe informacioneve nga përfaqësues të PD-së në terren, mbi 20 persona kanë mbetur të plagosur gjatë përplasjeve, disa prej tyre me lëndime kritike.
Sipas tij, plagosjet janë shkaktuar nga përdorimi i gazit lotsjellës, plumbave të gomës, shkopinjve të gomës dhe dhunës fizike nga policia.
“Po gjakoset Shqipëria që Edi Rama të shpëtojë pushtetin e tij! Po dhunohet rinia shqiptare, po goditen studentët dhe po përdoret forca e shtetit për të mbrojtur interesat e një kryeministri që refuzon të mbajë përgjegjësi përpara qytetarëve dhe ka ikur në drejtim të paditur”, u shpreh Balliu.
Deputeti i PD-së e cilësoi ndërhyrjen e forcave speciale si pjesë të një përpjekjeje për të shtuar presionin ndaj protestuesve, ndërsa akuzoi kryeministrin se po përdor strukturat shtetërore për të mbajtur pushtetin.
Shifrat për të plagosurit dhe pretendimet për mënyrën e ndërhyrjes së policisë janë ato të deklaruara nga Klevis Balliu, ndërsa nuk janë dhënë në këtë deklaratë të dhëna të pavarura që t’i konfirmojnë ato.m.k
