Drejtori ekzekutiv i Tesla-s, Elon Musk, prezantoi një makinë që, sipas tij, do të jetë në gjendje të fluturojë, një veçori që deri më tani i përkiste kryesisht fantashkencës dhe filmave vizatimorë. Gjatë një prezantimi në një qendër testimi në Teksas, që i përket SpaceX, kompanisë tjetër publike të Musk-ut, ai shfaqi modelin e ri "Roadster" të Tesla-s. Kjo makinë sportive me dy vende jo vetëm që mund të përshpejtojë nga 0 në 100 km në orë në një kohë rekord prej më pak se një sekonde, por, siç shpjegoi Musk, përdor gjithashtu një sistem thithjeje në pjesën e poshtme për t'u ngjitur në një rampë të pjerrët dhe të shkëputet prej saj, të rrotullohet në ajër dhe të përdorë motorin reaktiv për tu ulur në tokë. Gjatë demonstrimit, makina nuk kishte një shofer, gjë që u bë "për t'u siguruar që të mos lëndojmë askënd", u tha Musk të pranishmëve. "Suksesi nuk është i garantuar," tha ai. "E them seriozisht. Ka gjasa të funksionojë, por nëse nuk funksionon, ne jemi në një distancë të sigurt". Pavarësisht suksesit të këtij eventi, mbetet për t'u parë nëse makina do të jetë vërtet në gjendje t'i përmbushë premtimet: t'u ofrojë pronarëve mundësinë për të fluturuar (e jo thjesht për të kryer kërcime të shkurtra) dhe, njëkohësisht, për të lëvizur me shpejtësi të lartë në rrugë. Prodhimi i makinës do të fillojë në vitin 2028; megjithatë, gjatë historisë së Tesla-s, Musk ka bërë shpesh premtime për afatet kohore të realizimit të projekteve, të cilat më pas janë shtyrë për disa vite.