Po sikur renditja e Serisë A të mos përcaktohej nga rezultatet në fushë, por nga rastet e krijuara, cilësia e goditjeve dhe performanca mbrojtëse? Sipas faqes së specializuar Understat, Juventusi do të kryesonte klasifikimin me 14.65 pikë të pritshme, përpara Interit me 13.94, Romës me 13.24 dhe Napolit me 11.69 pikë.
Një kontrast i madh me realitetin, pasi skuadra e Luciano Spallettit ndodhet në vendin e gjashtë dhe ka pesë pikë më pak se kryesuesit Inter dhe Lazio. Problemi kryesor i bardhezinjve mbetet mungesa e konkretizimit, një dobësi që po u kushton pikë të çmuara.
Në gjashtë javët e para, Juventusi ka regjistruar numrin më të madh të prekjeve të topit në një të tretën sulmuese të kundërshtarit, por renditet i fundit për përqindjen e goditjeve të kryera nga brenda zonës. Skuadra krijon volum loje, por shpesh përfundon në tentativa të vështira, me pak mundësi për të gjetur rrjetën.
Në aspektin mbrojtës, shifrat janë më pozitive. Kundërshtarët duhej të kishin shënuar vetëm 2.92 gola sipas pritshmërive, por Juventusi ka pësuar pesë. Megjithatë, loja sulmuese mbetet shqetësuese: pesë nga nëntë golat e shënuar nga bardhezinjtë, ose 56 për qind e totalit, kanë ardhur pas minutës së 80-të.
Problemi qëndron te cilësia e goditjeve
Në ndeshjen ndaj Cagliarit, Juventusi regjistroi 22 goditje, 19 prej të cilave prodhuan vetëm 0.58 gola të pritshëm. Në total, pas gjashtë javësh, bardhezinjtë kanë tentuar 110 goditje, 39 në kuadrat, me 11.61 gola të pritshëm.
Mesatarja prej 0.11 xG për goditje është dukshëm më e ulët se ajo e Milanit dhe Romës, me 0.15, si dhe Interit, Lazios dhe Napolit, me 0.14.
Shifrat tregojnë se Juventusi arrin të krijojë, por jo të shndërrojë rastet në gola. Pa përmirësuar saktësinë dhe cilësinë e finalizimit, ekipi i Spallettit rrezikon të mbetet lider vetëm në statistika, ndërsa në renditjen reale vazhdon të ndjekë rivalët.