Një dokument analitik rus, i siguruar nga njësia investigative Skemat e Radios Evropa e Lirë (REL), përshkruan një skenar të mundshëm sulmesh ndaj infrastrukturës energjetike dhe shërbimeve komunale të Ukrainës, me synimin për të ndërprerë furnizimin me energji elektrike, ngrohje dhe ujë në qytetet kryesore të vendit. Sipas REL-it, dokumenti, i datës gusht 2026, identifikon 60 objektiva kyç, përfshirë centrale bërthamore, hidrocentrale dhe objekte të tjera energjetike. Ai përmban gjithashtu llogaritje të sasisë së raketave, dronëve dhe municioneve që do të nevojiteshin për të dëmtuar rëndë furnizimin me energji në Kiev, Harkiv dhe Odesa. Dokumenti përfshin edhe objektiva që lidhen me rrjetet e transmetimit dhe ndërlidhjet elektrike pranë kufirit perëndimor të Ukrainës, përmes të cilave vendi importon energji nga Evropa. Ministri ukrainas i Energjisë, Denys Shmyhal, kishte deklaruar më herët se ua kishte paraqitur zyrtarëve evropianë planet ruse për sulme ndaj infrastrukturës energjetike, gjatë një takimi në Paris më 17 shtator.Megjithatë, ekspertët ukrainas të cituar nga REL-i theksojnë se dokumenti nuk përbën një plan të mirëfilltë operacional për sulme konkrete, por një analizë që mund të përdoret për të përcaktuar nevojat për municione dhe për të planifikuar prodhimin e tyre. Rusia ka sulmuar vazhdimisht infrastrukturën energjetike të Ukrainës që nga fillimi i pushtimit në shkallë të plotë, në shkurt të vitit 2022. Sipas të dhënave të Prokurorisë së Përgjithshme të Ukrainës, të raportuara nga REL-i, autoritetet po hetojnë 3.374 sulme ruse ndaj 1.177 objekteve energjetike.