Me forcën e kartonave socialistët pikturuan kufij të rinj për hartën administrative territoriale. Një hartë, që u shoqërua me pikëpyetje dhe kritika nëse mbart interes qytetar apo elektoral. Numri i bashkive tashmë reduktohet nga 61 në 46 të tilla, pra shkrihen 15 bashki të vendit. Javën e ardhshme pritet që të ringrihet komisioni i posaçëm i reformës territoriale për të avancuar me ndryshimet në kompetencat e pushtetit vendor, përmes ndërhyrjeve në ligjin e financave dhe vetqeverisjes vendore. Sipas burimeve, në këtë komision socialistët synojnë të mos kenë numër të barabartë anëtarësh mes opozitës dhe mazhorancës, për të shmangur mundësinë e bllokimit të punës përmes bojkotit opozitar. Në Qarkun e Tiranës, Rrogozhina bashkohet në një bashki me Kavajën. Fitorja e Kavajës është pikësynimi kryesor i socialistëve, dhe sfida e drejtuesit politik, Taulant Balla. Në vendoret e 2023-it diferenca ishte tepër e ngushtë prej vetëm 21 votash. Bashkimi i Kavajës me Rrogozhinën do amortizonte votat e demokratëve dhe do i jepte avantazh socialistëve. Një tjetër ndryshim është njësia administrative e Rinasit, që do të jetë pjesë e Bashkisë së Tiranës dhe do të përfshijë territorin e fshatrave Rinas, Bërxullë dhe Domje. Në qarkun e Beratit, numri i bashkive reduktohet nga pesë në tre të tilla. Konkretisht Poliçani dhe Dimali bëhen pjesë e bashkisë së Beratit, ndërsa Kuçova dhe Skrapari qëndrojnë si bashki më vete. Për këtë prekje të hartës, pati kundërshti të forta veçanërisht nga Poliçani që kërkon ruajtjen e identitetit të vetë historik.