Reforma Territoriale ka sjellë debate këtë të hënë në Komisionin për Çështjet Ligjore dhe Administratën Publike, ku deputeti i Partisë Demokratike, Tomorr Alizoti, ka kundërshtuar mënyrën se si po trajtohet procesi. Gjatë diskutimeve, Alizoti kërkoi që në çdo ndryshim të hartës territoriale të merret parasysh qëndrimi i banorëve dhe strukturave vendore të zonave që preken.
Sipas tij, një reformë e tillë nuk mund të miratohet me nxitim, pasi pasojat e saj lidhen drejtpërdrejt me jetën e komuniteteve. Deputeti demokrat solli si shembull Përrenjasin, duke argumentuar se kundërshtimi i këshillit bashkiak apo i banorëve të një zone nuk mund të anashkalohet vetëm për shkak të shumicës parlamentare.
“Çdo reformë do kohë sepse flitet për territorin që prek njerëzit, nuk mundet që të mos merret parasysh dëshira e njerëzve që jetojnë atje”, u shpreh Alizoti. Ai akuzoi mazhorancën se po shmang diskutimin mbi thelbin e reformës dhe se, sipas tij, ndryshimet po orientohen nga interesa elektorale.
“Anashkaloni thelbin për qëllimet tuaja. Ky është një qëllim elektoral. Nuk mund të bëni një hartë elektorale për njerëzit që nuk e duan”, deklaroi Alizoti. Debati në Komision pritet të vijojë në kuadër të diskutimeve për ndryshimet në organizimin territorial dhe qëndrimin që do të mbajnë strukturat vendore dhe komunitetet e prekura.