Tre të rinj kanë mbetur të plagosur me thikë pas një sherri të regjistruar mbrëmjen e së mërkurës në qytetin e Sarandës. Ngjarja ka ndodhur rreth orës 22:00 në një subjekt tregtar në lagjen numër një të qytetit, pranë hyrjes së shëtitores. Në sherr janë përfshirë vëllezërit Elidon dhe Mario Shukulli, 24 dhe 20 vjeç, si dhe shtetasit Kamelo Aliaj, 22 vjeç dhe Andi Saliaj dhe Eduard Bajrami, nga 19 vjeç secili. Si pasojë e zënkës, dy vëllezërit Shukulli dhe Andi Saliaj kanë marrë plagë nga goditjet me thikë. Njëri prej vëllezërve, Elidoni 24 vjeç është transportuar për në spitalin e Traumës në Tiranë për të marrë mjekim më të specializuar. Ndërkohë policia pas hetimeve të kryera, ka vënë në pranga dy persona, përshirë një prej të plagosurve. Nën akuzat “plagosje e rëndë me dashje” dhe “prishje e rendit dhe qetësisë publike” janë arrestuar Kamelo Aliaj 22 vjeç, Andi Saliaj 19 vjeç, ndërsa është shpallur në kërkim Eduard Bajrami 19 vjeç.