Kryeministri Edi Rama ka reaguar pas protestës së zhvilluar në Vlorë kundër ndërtimit të Muzeut Hebraik, ku pati edhe përplasje mes protestuesve dhe policisë.
Protestuesit kundërshtuan projektin dhe tentuan të hynin në kantier, duke pretenduar se punimet po kryhen në godinën historike të Klubit Patriotik “Labëria”.
Rama i ka mohuar këto pretendime, duke sqaruar se Muzeu Hebraik po ndërtohet në një tjetër godinë historike, një banesë e viteve 1850, pranë Muzeut Etnografik. Sipas tij, ndërkohë është parashikuar edhe rijetësimi i Muzeut “Labëria”.
Në reagimin e publikuar në platformën “X”, kryeministri ka sulmuar ashpër protestuesit dhe veçanërisht Bujar Leskajn, të cilin e ka akuzuar se po përdor të njëjtën mënyrë proteste kundër projekteve të transformimit të Vlorës.
Rama bëri të ditur se, me kërkesën e tij, Fondi Shqiptaro-Amerikan i Zhvillimit ka akorduar 200 mijë dollarë për hartimin e projektit të rijetësimit të Muzeut “Labëria”.
Sipas kryeministrit, godina aktuale e muzeut është në gjendje të degraduar dhe synimi është që ajo të rikthehet në një pikë me rëndësi për identitetin, historinë dhe turizmin e Vlorës, krahas Muzeut Hebraik.
